Халық шығармашылығы: шеберлік классы

ҚР президенті Қ.Тоқаевтың бастамасымен 2022 жыл ТМД елдерінің халық шығармашылығы және мәдени мұрасы жылы болып жарияланған болатын.  Осыған орай, 1 сәуір күні ШҚО Абай атындағы әмбебап кітапханасы Қалалық Достық үйі өкілдерімен бірлесіп «Халық шығармашылығы» деген тақырыпта шеберлік сағат ұйымдастырды. Шеберлік сағатқа кітапхана қызметкерлері мен оқырмандар қатысты.

Шара барысында Қалалық қазақ мәдени орталығы, «Айша Бибі» қоғамдық бірлестігінің жетекшісі Бокпасарова А.И. көшпелі қазақ халқының ежелден келе жатқан қолөнер түрі «Киіз басу» туралы мол мағлұмат беріп, киізден жасалатын бұйымдардың ерекшеліктері мен пайдасын атап айтты. Ежелден халқымыз киізден туырлық, үзік, түндік, алаша, текемет, сырмақ сияқты тұрмысқа қажетті бұйымдар жасаған.  Бүгінде ұмыт қалған осынау дәстүрді жалғастырып, төрт түліктің жүнін кәдеге асырып, заманауи түрлі бұйымдар жасайтындар да бар. Есесіне табиғи өнімнен жасалған ерекше стильдегі киімнің де, бұйымның да құны жоғары бағаланып, сұранысқа ие болып тұр. Сонымен бірге жүннен басылатын киіз де қайта жаңғырып келеді.

Шеберлік сағат аясында Бокпасарова А.И. қатысушыларға республикалық деңгейдегі көрмелерге қойылған киізден жасаған бұйымдарын көрсетіп, тіпті қазақтың бұл сәндік-қолданбалы өнеріне шетел азаматтары тәнті болғанын айтты.

Шара соңында қолөнер шебері қатысушылардың сұрақтарына жауап беріп, кейінгі ұрпаққа ата-бабаларымыз, шебер әжелерімізден қалған, ұмытылып бара жатқан қолөнерді жаңартып жаңғырту, бізге қалдырған асыл мұраны сақтау біздің борышымыз екенін жеткізді.