Халықтың Әз-ағасы: көше мерекесі

Қазақстанның халық жазушысы, мемлекеттік сыйлықтың лауреаты Әзілхан Нұршайықовтың 100 жылдық мерейтойына арналған апталықтың екінші күні 10 сәуір күні жазушы атындағы көшеде жалғасты Кітапхана мамандары көше тұрғындарына ерекше көңіл-күй сыйлады. Көше тұрғындарын жазушының шығармашылығына арналған кітап көрмесі қарсы алды.

Мереке басында қатысушыларға халық жазушысының өмірі мен шығармашылығы туралы танымды ақпарат беріліп, заманында көзі көрген, дәмдес, сырлас болған жерлестерінің естеліктері айтылды. Семейдің Шәкәрім атындағы университетінің профессоры Мұхамедқазы Мұхамедиұлы жазушының жас кезіндегі журналист қызметінен бастап, соғыс кезіндегі басынан өткерген оқиғаларын, «Махаббат қызық мол жылдар» романының жазылу тарихы жайлы баяндады.  Семей жерінен шыққан танымал талант иелерінің қоғамға сіңірген еңбектері жайлы Ә.Нұршайықовтың жазған естеліктерін тілге тиек етті. Сазгер жерлесіміз Т. Базарбаевтың қабірінің басында сазгерге берген бағасы жайлы әңгімеледі.

Қоғам белсендісі, мәдениеттің жанашыры Адай Зейнолданұлы да Әзілхан Нұршайықов туралы естеліктерімен бөлісті. 2008 жылы өзі мұрындық болып Абай драма театрының артистері «Махаббат қызық мол жылдар» шығармасы бойынша қойылым қойған кезде, пьесаның премьерасына жазушының өзі қатысып, керемет әсер алып, соғысқа дейінгі, кейінгі кездерін есіне алып, көзіне жас алғанын жеткізді. 2018 жылы халық жазушысының атына көше берілуіне өзінің  ұйтқы болғандығын әңгімеледі.

Ә.Қашаубаев атындағы филармонияның әншілері Бақытгүл Исаевалар мен Қаділбек, Маржан Омаровтар әсем әндерімен мерекелік шараның сәнін келтіріп, Мұзафар Әлімбаевтің сөзіне жазылған Шәмші Қалдаяқовтың «Ақ маңдайлым» әнін және А.Сапышовтың сөзіне жазылған Т.Рахимовтың «Махаббат қызық мол жылдар» әнін орындады.

Қатысушылар кітап көрмесіндегі жазушының өмірі мен шығармашылығын айшықтайтын таңдамалы шығармаларының он томдығына, Кеңес Одағының Батыры Бауыржан Момышұлы туралы «Ақиқат пен аңыз»  және соғыстан кейінгі өмір туралы жазылған «Махаббат қызық мол жылдар» романына, «Махаббат жыры», «Тоғыз толғау» сынды кітаптарына қызығушылық танытып, өздерінің сұрақтарын қойды.

Халық жазушысы атындағы көшенің тұрғындары ұйымдастырылған шараға ризашылықтарын білдіріп тарасты.