Махаббат қызық мол жылдар: оқырмандар конференциясы

Сәуір айының 13-ші жұлдызында Абай атындағы кітапхана Шәкәрім атындағы университет студенттерімен және Мұхтар Әуезов атындағы педагогикалық колледж студенттерінің басын қосып, халық жазушысы, Мемлекеттік сыйлықтың лауреаты Әзілхан Нұршайықовтың 100 жылдық мерейтойына арналған  апталық аясында «Махаббат қызық мол жылдар» атты оқырмандар конференциясын ұйымдастырды.

Шара барысында Шәкәрім университетінің филология факультеті, «Қазақ тілі мен әдебиеті» мамандығының студенттері белсенділік танытып, Батурханова Мерей Ә. Нұршайықовтың өмірбаянына тоқталып, қатысушыларға көптеген ақпарат ұсынса, Төкенов Алмат қаламгердің «Ақиқат пен аңыз», Түсіпқанова Гүлназ «Мәңгілік махаббат», Шағыманова Еркеназ «Махаббат қызық мол жылдар» шығармаларына жекелей баяндама жасап қатысушылардың зор ықыласына бөленді.

Оқырмандардың ой толғамына әсер еткен автор шығармаларының ішіндегі маңыздысы шынайы махаббат тақырыбы болды. Осы тұста педагогикалық колледждің «Бастауыш пәнін оқыту» мамандығы мен «Қазақ тілі мен әдебиеті» мамандығының студенттері өзара тамаша пікір талас жасады. Қазіргі махаббаттың бағасы қандай? Ескі қоғаммен жаңа замандағы сезім айырмашылығы неде? Бүгінгі адамдардың махаббатқа тұрақтылығы? – деген сұрақтар бойынша өз пікірлерін ортаға салды.

Шара соңында Шәкәрім университетінің КЯЛ–101 тобының кураторы, қазақ филологиясы және журналистика кафедрасының аға оқытушысы, ф.ғ.к. Сабырбаева Раушан Қойшанқызы және педагогикалық колледждің оқытушысы Түсіпбаева Сәуле Қайсақызы өздерінің жеке пікірлерін жеткізіп, жалпы шараның жастарға берер пайдасы көп екенін тілге тиек етіп, Абай атындағы кітапхана ұжымына зор алғыстарын білдірді.