Кітапханамен танысу: экскурсия

24 мамыр күні М. Әуезов атындағы педагогикалық колледждің аударма ісі бөлімінің 2 курс студенттеріне Абай кітапханасының бөлімдері бойынша экскурсия өткізді. Шетел әдебиеттері кафедрасында болашақ аудармашыларға арналған аударма ісі бойынша кітап көрмесі ұйымдастырылды.
Аталмыш көрме барысында студенттер көркем әдебиеттерді аударуға байланысты басылымдарға аса қызығушылық танытты. Атап айтқанда, Т.А. Казакованың «Практикум по художественному переводу», Ю.В. Пиввуеваның «Пособие по теории перевода», көркем аударма ісі туралы «Аударма ісі: байырғы трактаттар мен кейінгі толғамдар» және т.б. жалпы аудармаға байланысты М.Ю. Семенованың «Основы перевода текста», В.А. Митягинаның «Подготовка переводчика», Л.Г. Шереминскаяның «Настольная книга переводчика» басылымдары үлкен сұранысқа ие болды.
Сонымен қатар, педагогикалық колледж студенттері кітапханамыздың басқа да бөлімдерімен, кітапхананың бай тарихымен, сирек кездесетін кітап қорымен және ақпараттық қызметтерімен танысты. Абайдың рухани орталығында болған студенттер сирек кездесетін басылымдарды, оның ішінде Абай оқыған кітаптарды, далалы өлке зерттеушілерінің еңбектерін, әлем әдебиеті жауһарларын, Абайдың әлем тілдеріндегі шығармаларын көріп, керемет әсер алды. Шара соңында қатысушыларға кітапхана ережелері мен қауіпсіздік ережелері түсіндірілді.