Соғыс – мәңгі өшпес естелік: онлайн кездесу
2022 жылдың 26 мамырында Шығыс Қазақстан облысының Абай атындағы әмбебап кітапханасында Могилев қаласының (Беларусь) облыстық жасөспірімдер кітапханасымен Ұлы Отан соғысына арналған «Соғыс – мәңгі өшпес естелік» атты онлайн кездесуі өтті. Онлайн іс-шараға Могилев қаласының 10-11 сынып оқушылары мен Семей қаласының М.Әуезов атындағы педагогикалық колледжінің студенттері шақырылды. Семей қаласынан қатысушылар Аманжолова Наргиз, Толеуханова Аделия, Мустафинова Нурай, Сухатова Дария Қазақстанның Халық Қаһарманы Бауыржан Момышұлының ерліктері, гвардия полковник-танкисті Әділбеков Ғали Әділбекұлы, Мәншүк Мәметова, Әлия Молдағұлова туралы баяндамалар дайындады. Сондай-ақ Беларусь қатысушылары Могилев облысында соғысқан Юрий Зарудин, Әди Шәріпов туралы айтты.
“В.И.Ленин атындағы Могилев облыстық кітапханасының” жастар бөлімінің меңгерушісі Елисеева Марина Владимировна соғыс жылдарындағы Могилев қаласының корғанысы туралы кіріспе әңгіме дайындады.
Іс-шара барысында қатысушылар Могилев қаласының қорғанысымен, Семей қаласының Ұлы Отан соғысына қосқан үлесі туралы ақпаратпен танысты, 8-ші және 238-ші атқыштар дивизияларының құрылуы туралы, сонымен қатар қала кәсіпорындарының жасаған еңбегі, қалада 7 эвакуациялық аурухананы ұйымдастырылғаны, және кітапхана қызметкерлері М.И. Тривалская және М.В. Акимованың екінші дүниежүзілік соғыста жеңіске жету жолында жасаған ерліктері туралы білді. Могилев қаласының 9-сынып оқушысы Артем Сальков Могилевтегі есте қаларлық киелі жерлер туралы айтты.
Белсенді қатысқаны үшін Могилев қаласы мен Семей қаласының студенттері естелік кітаптармен марапатталды.
