Мен әлі өмір кешем..: кездесу
Мамыр айының 29 күні Абай атындағы кітапханада ақын, Қазақстан Жазушылар одағының мүшесі, Үржар ауданының құрметті азаматы Айжарық Абылқасымов қонақта болып, кітапсүйер қауыммен кездесті.
Шараға кітапханамыздың қымбатты оқырмандары, қаламыздағы зиялы қауым өкілдері мен жыр сүйер қауым қатысты. Қала әкімінің орынбасары Садырбаев Айдар Серікқазыұлы ақынды асқаралы 60 жысымен құттықтап, иығына шапан жауып, республикалық «Абай» қорының «Абай» медалін тақты. Республикалық «Абай» журналының редакторы, ақын Мұратбек Оспанов пен Қазақстан Жазушылар одағы Семей бөлімшесінің төрағасы, ақын Мерей Қарт Қазақстан Жазушылар одағының басшысы, ақын Ұлықбек Есдаулеттің құттықтауын жеткізіп, сыйлығын тапсырды. Семей қалалық ішкі саясат бөлімінің жаңа басшысы Олжас Соғымбай өзінің арнау өлеңін оқыды. Қ.Нұрқасым, А.Бейсенбеков, А.Исин, Қ.Сабырбай, Қ.Қабыш сынды ақынның замандастары мен кейінгі буын өкілдері сөз алып, ақынның шығармашылығы жөнінде айтып, естеліктерімен бөлісті.
Жарқын жүздесуде қатысушыларымыз ақынның өмір жолымен, алғашқы басқан қадамы, жалпы өзіндік ақындық әлемінің қалыптасуы кезеңінен хабардар болды. Қонағымыз өзінің басынан кешкен қиын кезеңдерін, сол уақытта жанына серік болған жан-жары Гүлбаһрам апамыздың шыдамдылығы мен қайсарлығы жайында сөз етті. Ардақты ата-анасын еске алып, өз бауырынан өнген ұрпағы жайында да ақтарылып айтып берді. Сонымен қатар, ақын ағамыз әлі сиясы кеппеген «Мен әлі өмір кешем…» кітабын сыйға тартып, тың шығармаларымен таныстырды.
Айжарық мырза өз сөзінде ақынның ғаламға ғашықтығын, табиғатқа тамсануын, сұлулыққа сүйсінуін, мөлдір махаббатын, сезім сергелдеңін жәй сөзбен айта алмайтынын, толқыған жантебіренісінен осының бәрі өлең болып туатынын оқырманға ұғындырды.
Кеш соңында өз-өзіне қамшы басып, қайрап жазған «Мен әлі өмір кешем…» өлеңін оқып, кіндік қаны тамған туған өлкесіне арналған әнін шырқап, көрерменнің зор ықыласына бөленді.
Қаламыздағы №15 ЖББОМ оқушысы Арқаш Жігер ақынның мерейтойына күй шертіп, қатысушыларға мерекелік көңіл күй сыйлады.
