Сыңғырласын әрқашан балалықтың күлкісі: мерекелік шара

Елімізде Балалар жылы және Халықаралық балаларды қорғау күніне арналған «Балалардың игілігі үшін» республикалық акция аясында, Абай атындағы әмбебап кітапханасы жас оқырмандар арасында балаларды жеке тұлға ретінде көрсете білуге тәрбиелеу, ойын-сауық, би билеу арқылы белсенділіктерін арттыру мақсатында «Сыңғырласын әрқашан балалықтың күлкісі» атты көңілді мерекелік шара ұйымдастырды.
Бүкіл әлемде 1 маусым – Балаларды қорғау күні ретінде аталып өтіп, халықаралық мейрамдардың бірінен саналады. Мерекені өткізу жөнінде шешім 1949 жылдың қараша айында Халықаралық демократиялық әйелдер федерациясының арнайы сессиясында қабылданды.
Шара барысында «Пысық құлан», «Қасқыр мен қоян», «Көңілді көжек» сынды таңғажайып ертегілер әлемін бейнелейтін ашылмалы кітаптар, Зира Наурызбаеваның «Алтын тостағанды іздеу», Т.Әбдірайымның «Алабұға аулаған күн», Б.Соқпақбаевтың «Балалық шаққа саяхат», Абай оқыған ертегілер, танымдық энциклопедиялармен жасақталған иллюстративті кітап көрмесіне шолу жүргізілді. «Шебер колдар» үйірмесінің еріктісі Зубкова С.В. «Шалғындағы саңырауқұлақтар» атты шеберлік сабағын өткізіп, балалар асфальтта «Мен жазды бейнелеймін» тақырыбына арналған сурет сайысына қатысып, арқан тарту, қол күрес, эстафеталық ойындарға белсене қатысып, сыйлықтарға ие болды, ал ертегі кейіпкерлерінің костюмдерін киген кітапхана қызметкерлері балдырғандармен бірге би билеп, ән айтып мерекеге ерекше көңіл-күй сыйлады.
Семейдегі «Отбасы орталығы» қоғамдық қоры мен кітапхана кәсіподағының қолдауымен өткен мерекелік шара соңы кітапхана әкімшілігі тарапынан табысталған алғыс хаттар марапатымен аяқталды.