Ілияс мінген қарагер: онлайн кездесу кеші

2022 жылдың 22-ші маусымында Абай атындағы облыстық әмбебап кітапханада «Ілияс мінген қарагер» атты ZOOM платформасы арқылы онлайн кездесу кеші ұйымдастырылды. Кеш Халықаралық «Дарабоз» бәйгесінің бас жүлдегері, «Қазақ тарихы» журналының бас редакторы, жерлесіміз  Әбділдабек Салықбайдың 60 жасқа толған мерейтойына арналды.

Кездесудің шымылдығын Халықаралық «Алаш» әдеби сыйлығының лауреаты Әбубәкір Қайран ашып,  Әбділдабек Салықбайдың өмірбаяны мен шығармашылығынан баяндама жасады.

Аталмыш кездесудің басты мақсаты мерейтой иесін 60 жас мерекесімен құтықтай отыра, жерлес қаламгеріміздің мәртебесін асқақтатып, мерейін үстем ету, шығармашылығын оқырмандарға таныстыру болды. Кездесу барысында, қатысушылардың сұрақтарына жауап берген мерейтой иесі, қазақтың маңдайына біткен тұлғасы, алаштың аймаңдай азаматы Жұмабек Тәшеновке  «Наркескен» хикаятын арнағанын тілге тиек етті. Сонымен қатар, «Ақтық айқас» хикаятына тоқталып, бас кейіпкер Санжардың жетегімен Еуропаның көптеген қалаларын аралап, сол саяхаттар шығармашылығына көп әсер етткенін де айтты. Әңгіме аясында, Семей қаласы Абай облысы оның ішінде Хакім Абайменен, Алаш арыстарының аманатын арқалап, үлкен бір құнды дүниені жарыққа шығарғысы келетініне тоқталды. Шетелдегі сапарында, келелі мәселемен, ауқымды дүниелер жасауға ат салысып жүрген Әбділдабек Салықбай, алдағы жұмыс жоспарымен де бөлісті. Өзінің мерейтойы қарсаңында кітапханамыздың оқырмандарына сыйға тартқан «Айдана мен Ақжолтай», «Түн түнегіндегі екеу», «Мақаншы қарыздармын мәңгі саған» кітаптарының мазмұны туралы баяндады.

Шара соңында кеш қонағы өз ойын бір арнаға қортындылап, киелі Абай еліне, оның ішінде Абай кітапханасының ұжымына алғысын білдіріп, өз сөзін аяқтады.