Қазақстан Республикасы парламенті мәжілісінің депутаттарымен кездесу
4 шілде күні Абай атындағы облыстық кітапханада Қазақстан Республикасы Парламенті Мәжілісінің депутаттары Рахымжанов Әмірхан Мұратбекұлы мен Омарбекова Жанат Әнуарбекқызының кітапхана ұжымымен кездесуі өтті.
Кездесуде депутаттар өздерінің қызметтері туралы толық ақпаратпен бөлісті. Абай облысының проблемалары мен оларды шешу жолдарын атап өтті. Кітапхана ұжымының қойған сұрақтарына жауап берді. Кітапханашылар елімізде кітапхана туралы Заңның қабылдануы мен «Цифрлы Қазақстан» бағдарламасына сәйкес мәселелер жөнінде және жас мамандар мәселесі мен еңбекақыны көбейту сынды қордаланған мәселелер жөнінде сұрақтар қойып, ұсыныстарын ұсынды. Сонымен қатар, облыстың әлеуметтік мәселелері жөнінде көкейде жүрген сұрақтарымен бөлісіп, тиісті жауаптарын алды.
Парламент Мәжілісі депутаттарына кітапхана тарихы мен қызметі туралы ақпараттар берілді. Абайдың рухани орталығында болып, заманында Абай оқыған кітаптармен, Абайдың қайраткерлік тұлғасын көрсететін басылымдармен және Алаш қайраткерлерінің көзі тірісінде жарық көрген еңбектерімен танысты. Депутаттар кітапханамыздың сирек қоры жайында алған әсерлерімен бөлісіп, алғыстарын білдірді.
