«Алашорда қызметі мен Сейітбаттал Мұстафаұлының өмірбаяны»: бейнедәріс

Абай облыстық Абай атындағы әмбебап  кітапханасында 7 маусым күні ZOOM платформасында «Алаш» жобасы аясында Ақмола облысының тумасы, Алаш қозғалысының көрнекті өкілі, ағартушы-ұстаз болған Сейітбаттал Мұстафаұлының туғанына 130 жыл толуына орай «Алашорда қызметі мен Сейітбаттал Мұстафаұлының өмірбаяны» атты бейнедәріс ұйымдастырылды. Эфир  қонағы әдебиет  тарихшысы,  ғалым  Л. Н. Гумилев атындағы  Еуразия ұлттық  университетінің  Ph  докторанты Заңғар Кәрімхан белсенді өмірі мен қоғамдық қызметі, шығармашылығы туралы  мол ақпарат берді.

16 жасында Стамбул қаласында «Шипагерлер» университетінде  оқығандығын, оны тәмамдағаннан кейін Семей қаласында ұстаздық қызмет жасағандығын, 1918 жылы ашылған Абай журналында М.Әуезов пен Ж.Аймауытовпен бірге жүріп қызмет еткендігін тілге тиек етті.

1913-1920 жылдар аралығында Семей және 1920-1922 жылдары Көкшетау қалаларында халыққа білім саласында атқарған қызметтері мен журналистік салада жазған мақалалары жөнінде баяндады.

Алаш қайраткерінің 1925 жылы Мәскеуде басылып шыққан «Шернияз» атты драмасы,  француз тілінен түрік тіліне аударған «Жәли қаһарман» атты романы, «Айқап» журналында жарияланған әр түрлі тақырыптардағы  мақалаларының мазмұны жайында айтылды.

Сейітбаттал Мұстафаұлының өмір жолына, қызметі мен оның тұлғасына қатысты архив құжаттары, қызы Нұрбике Батталқызының естеліктері және әдеби шығармалары мен мақалары топтастырылған кітаптың жарыққа шықандығы туралы хабардар етті.

Шараға қатысушылардың сауалдарына жауап беріп, Сейітбаттал Мұстафаұлының еңбектері, шығармашылығы әлі де зерттеуді қажет ететіндігін атап өтті.