Мұхтар Әуезов – Семей семинариясының түлегі: бейнедәріс

Абай атындағы кітапханада 14 қыркүйек күні  ZOOM платформасында әр аптаның сәрсенбі күні «Алаш» жобасы аясында бейнедәріс өткізу дәстүрге айналған. М. Әуезовтың туғанына 125 жыл толуына орай ұйымдастырылған эфирдің  қонағы  М.Әуезов атындағы педагогикалық колледждің  директоры, филология ғылымдарының кандидаты Жанаева Шағангүл Алдамжарқызы болды.

Заңғар жазушы 1903 жылы Батыс Сібір аймағында  ашылған тұңғыш оқу орны Семей семинариясына түскені және  М.Әуезовтің 1946 жылы  өз қолымен жазылған екі ғана өмірбаяны бары жайлы айтылды. Сонымен қатар,  Әуезовті қалаға тартып, орыс  мәдениетімен таныстыруда көп көмегін тигізген Қасымбек ағасы жайында сөз қозғалды. Семинарияда оқып жүріп 1917 жылы «Еңлік Кебек» пьесасын сахнаға шығарған. Семинарияда Нұрғали Құлжанов қызмет етіп, осы мекемеде  оқитын балалардың стипендиясынан қағылып қалмауына үлкен үлес қосқаны және 1915 жылы Нұрғали зайыбымен қазақ жастарын басын қосып үлкен кеш ұйымдастырғаны туралы құлақдар болдық.

Бейнедәріс барысында эфир қонағы Әуезовтың қызы Мұғамиланың әкесі түрмеде отырғанда оған қалай тамақ апарып, халін біліп тұрғанын да тілге тиек етті. Шара барысында жазушының өмір жолы мен қызметі жайында толық мәлімет берілді. Шараны қатысушылар мұқият тыңдап, ойларын ортаға салды. Қызықты да әсерлі, тағылымы мол дәріс болды.