Менің сүйікті жазушым: диктант

Абай атындағы кітапханада 16 қыркүйек күні балалар әдебиеті бөлімінің қызметкерлері «Қазақстандағы балалар жылы» және қазақтың көрнекті жазушысы, білім дариясының кемеңгері Мұхтар Омарханұлы Әуезовтың туғанына 125 жыл толуына орай, жазушының өмірі мен шығармашылығымен таныстырып, оқушылардың сауаттылығын арттыру мақсатында қаланың жалпы білім беретін бастауыш сынып оқушылары арасында «Менің сүйікті жазушым» тақырыбына диктант өткізді.
Диктант жазу барысында кітапхана қызметкерлері оқушыларға жазушының өмірі мен шығармашылығы туралы ақпарат беріп, қаламгердің адам мен табиғат арасындағы байланысты көрсететін «Көксерек» әңгімесінің қысқаша мазмұнымен таныстырып, диктантқа осы шығармадан үзінді ұсынылды. Диктант жазуға №17, №27, №35 жалпы білім беретін мектептердің бастауыш сынып оқушылары және №8 балалар үйінің тәрбиеленушілері қатысты.
Оқушылардың жұмысын бағалауға бастауыш сынып мұғалімдері мен кітапхананың оқырмандарға қызмет көрсету бөлімінің меңгерушісі Жанар Меллатқызы Чушекова қазылық етті. Ең үздік деп танылған І дәрежелі дипломмен № 17 орта мектептің 4 «А» сынып оқушысы Дильназ Ақанова, ІІ дәрежелі дипломмен №17 орта мектептің 4 «Ә» сынып оқушысы Әйгерім Сағынғали және ІІІ дәрежелі дипломмен №27 орта мектептің 3 «А» сынып оқушысы Бақытынұр Әмірғалинова марапатталып, ал басқа қатысушыларға алғыс хаттар табыс етілді.
Шара соңында кітапхана қызметкерлері қатысушыларға кітапхананың негізгі бөлімдері бойынша танымдық экскурсия өткізіп, кітапхана жұмысының ережелерімен таныстырды.