Семей – Қазақстанның рухани орталығы: кең көлемді экспозициялық көрме

18 қыркүйек күні Абай атындағы әмбебап кітапхана Арбатта қала күніне орай, «Семей – Қазақстанның рухани орталығы» тақырыбында кең көлемді экспозициялық көрме жасақтады.
Семей еліміздің мәдени-тарихи орталығы болып саналады. Көрмеде қаланың тарихи және мәдени дамуын айшақтайтын Абай кітапханасының қорынан әдебиеттер ұсынылды.
Көрменің «Семей – ғасырлар тоғысында» бөлімінде өлкетанушы, журналист және публицист Кошляктың «Семипалатинск: их именами названы», «Семипалатинские Арабески». «Печать Семипалатинска»” атты кітаптары мен т.б. басылымдарда Семей қаласының негізі қаланған күннен бастап бүгінгі күнге дейінгі тарихы баяндалады.
1917 жылдың көктемінде Алаш атқару комитетінің шешімімен Семейдің сол жағалау бөлігі Алаш қаласы болып жарияланған болатын. Көрменің бұл бөлімінде “Алаш” қозғалысының тарихы жөніндегі кітаптар мен оның белсенді қайраткерлерінің еңбектері басты орын алады. Көрмені тамашалағандар «Алаш қозғалысы. Движение Алаш», Е.Сыдықовтың «Алаш қаласының тарихы», «Алашорда қайраткерлері», Ә. Бөкейханның «Шығармаларына» аса назар аударды.
Семей өңірі – көптеген талантты композиторлардың, музыканттардың, суретшілердің отаны. Олар өз таланттарымен тек Семейді ғана емес, бүкіл Қазақстанды әлемге паш етті. Көрменің өнерге арналған бөлімі «Бибигуль Тулегенова», «Әнші Әміре», Ж. Шәкерімнің «Әміре Қашаубайұлы», Т. Рахимовтың «Қазағым-ай» және «Нені аңсаймын», «Семей суретшілері» атты жаухарларын ұсынды.
2018 жылдан бері жарық көріп келе жатқан “Абай әлемі” сериясының кітаптар топтамасының 2018-2021 жылғы шығарылымы бойынша өңіріміздің ақын жазушыларының еңбектері қала тұрғындарының қызығушылығын арттырды.