Үздік кітаптар: кең көлемді кітап көрмесі

23 қыркүйекте Абай атындағы кітапхана, кітапхана жанындағы Арбатта «KitapTime» республикалық фестивалін өткізді. Қала тұрғындары мен қонақтары үшін көркем әдебиет, «Абай әлемі» кітаптар топтамасы, балалар әдебиеті, өзін-өзі дамыту, хобби сынды бес бөлімнен тұратын «Үздік кітаптар» кең көлемді кітап көрмесі ұсынылды. Көрмеге қойылған кітаптардың барлығы да тұлғаның жас кезінен қартайғанға дейінгі әдеби-рухани дамуының мән-маңызын толық ашып берді. «Көркем әдебиет» және «Абай әлемі» кітаптар топтамасы фестиваль қатысушыларының назарына бүгінде әдеби жауһар болып табылатын қазақстандық жазушылардың, олардың ішінде Абай Құнанбаев, Шәкәрім Құдайбердіұлы, Мұхтар Әуезов және басқа да көптеген жазушылардың шығармалары, сонымен қатар, Бернард Шоу, Оливер Сакс, Хулио Кортасар және т.б. «Әлемді өзгерткен кітаптар» сериясы қамтылды.

«Балалар әдебиеті» тарауындағы кітаптар біздің жас оқырмандарымыз бен олардың ата-аналарының ерекше назарын аударды, өйткені олар әртүрлі басылым форматындағы жарқын да түрлі-түсті басылымдар: яғни сөйлейтін және ән айтатын кітаптар, 3D кітаптар, ертегілер, музыкалық шығармалар мен тағылымды әңгімелер.

Бүгінгі таңда өскелең ұрпақ арасында өзін-өзі дамыту тақырыбы ең танымал тақырыптардың бірі болып табылады, сондықтан фестивальге қатысқан жасөспірімдердің назарын аударған үздік кітаптардың бірі Стивен Кови, Джон Кехо, Әсел Қайратқызы, Дейл Карнеги, Джон Грей және т.б. қазақ және орыс тілдеріне аударылған басылымдар болды.

Жеке демалысты ұйымдастыру үшін көрмеде квиллинг, тігін, оригами сияқты хобби түрлері, Қазақстанның және әлем елдерінің ұлттық тағамдары, шаш үлгісін жасау және өз қолыңызбен әдемі және қарапайым заттарды жасап үйренуге арналған басылымдар ұсынылды.

Көрмеге жазушылардың портреттері, қаланың көрікті жерлерінің фотосуреттері, Абай атындағы кітапханада жұмыс істейтін шығармашылық үйірмелерде жасалған балалардың қолөнер бұйымдары кеңінен қойылды.