Әлем таныған Әуезов: көше мерекесі

28 қыркүйек заманымыздың заңғар жазушысы Мұхтар Омарханұлы Әуезовтің туған күні. Ұлы тұлғаның 125 жылдығына орай  Абай атындағы облыстық әмбебап кітапханасы мен М.О.Әуезов атындағы педагогикалық колледжі бірлесіп, М.Әуезов даңғылының бойында орналасқан ескерткішінің алаңында «Әлем таныған Әуезов» тақырыбында  көше мерекесін өткізді. Шараға алаңдағы демалушылар мен қала тұрғындары қатысты.

Мерекелік іс шарада кітапхана тарапынан «Ұлы даланың ұлы жазушысы» тақырыбында кітап көрмесі ұйымдастырылып, жазушының «Абай әлемі» сериясымен басылып шыққан төрт томдық «Абай жолы» роман эпопеясы, «Таңдамалы заман», «Таңдамалы шығармалары», т.б. туындылары мен Б. Щербаковтың «Жидебайдың жұлдызды даласы», «Неизвестное в наследии Мухтара Ауэзова. Архивные документы», Н.Анастасьевтің «ЖЗЛ. Мұхтар Әуезов»,  «Шығыс жұлдыздары» энциклопедиялық анықтамалығы, 200 автордың үш мыңға жуық мақаласы мен 500-ден астам иллюстрациялары енгізілген «Мұхтар Әуезов. Энциклопедия»,  ұлы жазушының қалыптақан  ортасы, оның аса бай шығармашылық мұрасы туралы жинақталған материалдар ұсынылып шолу жасалды. Қатысушыларға М.Әуезовтің «Абай жолы» атты ең әйгілі шығармасының бірінші кітабының жарыққа шыққанына 80 жыл толып отырғанын, шығарма жазушының есімін дүние жүзіне танытқаны туралы ақпараттар берілді. Кітапханамыздағы 1945 жылғы жарық көрген Леонид Соболевтің орыс тіліне аударған алғашқы басылымдарының бірі – «Путь Абая» студенттер арасында ерекше қызығушылық тудырды.

М.О.Әуезов атындағы педагогикалық колледжінің студенттері әдеби викториналар мен Ұлы жазушының шығармаларындағы кейіпкерлердің образдарын сомдап, көрініс көрсетіп,  «Жазушы мұрасы – ұлт қазынасы» тақырыбында  әдеби челлендж ұйымдастырып, шығармаларынан үзінді оқыды. Шара соңында «Мен Мұхтарды жырлаймын» атты ақындар шеруінде педагогикалық колледждің студенттері заңғар жазушының рухана арнауларын оқыды.