Халық бірлігі және жүйелі реформалар – ел өркендеуінің берік негізі: дөңгелек үстел

Бүгін кітапханамызда Абай облысының қоғамдық даму басқармасымен бірлесіп, еліміздің Президенті Қасым-Жомарт Кемелұлы Тоқаевтың 1 қыркүйекте халыққа жолдаған «Әділетті мемлекет. Біртұтас ұлт. Берекелі қоғам» Жолдауын талқылау мақсатында дөңгелек үстел өткізілді. Шараға қаламыздағы мәдениет мекемелерінің қызметкерлері қатысты.
Шара спикерлері ф. ғ. к., Alikhan Bokeikhan University профессоры М. М. Түйебаев, тарихшы, т. ғ. к., Шәкәрім университетінің профессоры М. Қ. Кәрімов және т. ғ. к., доцент м. а., Alikhan Bokeikhan University әлеуметтік гуманитарлық ғылымдар кафедрадасының меңгерушісі А. Қ. Рахметуллин болды.
М. М. Түйебаев Жолдауда Мемлекет басшысының айтып көрсеткен экономикалық даму, мемлекеттік басқару ісін жаңғырту, өнеркәсіпті күшейту салалары жайлы баяндады. Қоғамды дамытып, жаңа Қазақстан құру үшін жемқорлыққа жол бермеу керектігіне тоқталды.
М. Қ. Кәрімов басқару жүйесі, бюрократизм, Алаш арыстарының айтып кеткен земстволық басқару жүйесін тиімді пайдалану жөнінде пікірін білдірді. Ұлттық қор табысының 50 пайызы балалардың есепшотына жиналатындығы, кезектен тыс президент сайлауы жөнінде, айтып, бұл ұлт болашағы үшін жасалып жатқан тиімді қадам екенін ескертті.
Ұлтқа ұйтқы болатын, ұлтты біріктіретін негізгі тіл мәселесі, ел ішінде береке-бірлік пен тұрақтылықты сақтау жөнінде А. Қ. Рахметуллин баяндады.
Спикерлер Жолдаудағы қарастырылған әлеуметтік-экономикалық, қоғамдық-саяси мәселелердің, мемлекеттік басқару ісін жаңғыртудағы стратегиялық бағыттары мен шешімдері туралы өз ойларын ортаға салды. Халықтың көкейінде жүрген мәселелер де талқылаудан тыс қалған жоқ. Сонымен қатар, жаңа тұрпаттағы нағыз демократиялық, әділетті мемлекет қалыптастыруда барлығымыз саналы түрде ат салысуымыздың маңыздылығын да атап көрсетті. Шара барысында К. А. Байгужинов әділетті қоғам орнату туралы «Не все продается» өлеңін оқыды.