Сирек басылымдардағы Абай: сирек басылымдар көрмесі

Абай атындағы әмбебап кітапхана оқырмандар үшін «Сирек басылымдардағы Абай» – атты сирек басылымдар көрмесін ұйымдастырды. Кітапханаға келушілер сирек басылымдардың «алтын қорынан» ұлы ақын Абай Құнанбайұлының көзі тірісінде–ақ ол жайлы жазыла бастаған сирек дереккөздермен, ақын заманындағы сирек кітап мұраларымен танысты. «Қайнар» колледжінің студенттері кемеңгер ақынның қайраткерлік тұлғасын ашып көрсететін өлкетану қорын жақыннан тану мүмкіндігіне ие болды.
Қазақтың Абайындай дара тұлға оқырманы болған кітапханамен танысып, ақын пайдаланған мол әдебиеттер қорын көріп, Облыстық Статистикалық Комитеттің «Памятная книжкаларын», Семей географиялық бөлімшесінің «Запискилерін», Абайдың замандастары-өлкетанушылардың өлкеміздің тарихы, табиғаты, флорасы мен фаунасы жайлы жазған еңбектерін тамашалаған студент жастар онда жария көрген сирек деректердің құндылығына тәнті болды. Жас оқырмандар Абай заманы жайлы жазылған деректермен қанығып, рухани жан-дүниелерін байытатын ақпараттар алып, ризалықтарын білдірді.