Діни сауаттылық: ақпарттық сағат

Ағымдағы жылдың 18-ші қазанында облыстық Абай атындағы кітапханада «Діни сауаттылық» тақырыбына негізделген арнайы ақпарттық сағат өтті.
Ақпараттық сағаттың арнайы қонағы Бір мұнаралы тас мешіт имамы теолог Айдын Сіләмханұлы болды. Шараға Семей қаласындағы «Радиотехника және байланыс», «Қайнар» колледжінің студенттері қатысты.
Қонағымыз әуелі жастарға «дін» деген не екенін түсіндірді. Ата-бабаларымыздың ұстанған ырымы мен қағидатының түп қазығы осы дін екенін, сол себепті дәстүр мен діннің бір-бірінен арасы алшақ еместігін айтып берді.
Қазіргі жастардың санасында жүрген көптеген сұрақтардың ішінде «Сәлафизм дегеніміз не?», «Джихатқа кімдер шығады?», «Әбу Ханифа мәсхабын кімдер ұстанады?», «Қоғам мен діннің байланысы қандай?»-деген түрлі сауалдар өз жауабын алды.
Айдын Сіләмханұлы келген қатысушыларға түсінікті болсын деген ниетпен барлық мысалдар мен дәлел, дәйектемелерін қарапайым түрде күнделікті тіршілік тілімен жеткізді. Сонымен қатар тек діни тұрғыда ғана емес, бүгінгі күннің жастары білімді де білікті болуы керектігін, қанымызға сіңген тәрбиенің жақсы болуын, зиянды әрекеттерден аулақ болу керектігін, келелі кеңес, нанымды ақыл ретінде тілге тиек етті.