Желбірейді көк байрағы елімнің: кездесу

Ағымдағы жылдың 22-ші қазан күні Абай атындағы облыстық әмбебап кітапханасында қаламыздың жас ақындарымен «Желбірейді көк байрағы елімнің» атты арнайы кездесу өтті.
Шараға Семей қаласындағы Шәкәрім атындағы мемлекеттік университетінің жас ақындары мен «Қайнар» колледжінің студенттері қатысты.
Кездесуге келген жастарды кітапхана қызметкерлері Абай рухани орталығымен таныстырып, кітапханамыздың бай қорынан ақпарат беріп, қасиетті қара шаңырақтың тарихын айтып берді.
Республика күнін мерекелеуге ерекше ат салысып жүрген қаламыздың жас қаламгерлері Шәкәрім университетінің студенттері Аққу және Ақгүл Әрімбековалар және Айгерім Оралғазина өздерінің жалынға толы жырларын оқып келген көрерменге ерекше көңіл күй сыйласа, арнайы көрермендеріміз «Қайнар» колледжінің студенттері арасынан Турсунова Аружан хандар дәуірінен бастап бүгінгі тәуелсіз күнге дейінгі аралықты сыйдырған толғауын оқып, қатысушылардың ерекше ықыласына бөленді.
Жас ақындарымыз бен қатысушыларымыз атаулы күн жайында өздерінің ой-пікірлерін білдіріп, Отанды сүю осы елдің әрбір азаматының міндеті екенін тілге тиек етті.
Республика күнін жастар арасында насихаттау мақсатында өткізіліп отырған кездесуіміз жас буынға тамаша мерекелік көңіл-күй сыйлап, патриоттық сезімдерін оятты.