«Толағай» – тарихи Тарбағатай туралы толғау: бейнелекция

2022 жылдың 16-шы қараша күні Абай атындағы облыстық кітапхананың ұйымдастыруымен Zoom платформасында әр сәрсенбіде өтетін «Алаш» жобасы аясында «Толағай» – тарихи Тарбағатай туралы толғау тақырыбында алаштанушы, PhD докторант Заңғар Тілеуғазыұлы Кәрімханмен арнайы бейнелекция өтті.

Лекция барысында қонағымыз «Қыр баласы» қоғамдық қорының жетекшілігімен «Алаш кітапханасы» сериясымен жарық көрген өзінің «Толағай» кітабының таныстырылымын жасады.

Ең әуелі кітаптың атауының өзі туған жер, туған өлкеге деген тағзым екенін, Тарбағатай тауының бір бөлігі Толағай тауының дала аңызына сүйенсек тарихында терең мән-мағына жатқанын айта келе, аталмыш кітап ішінде елі үшін жанын құрбан еткен, еңбегі мен ерлігін көрсеткен тау тұлға азаматтардың өмірі жазылғанын айтып өтті.

Сонымен қатар Заңғар Тілеуғазыұлы жаңа кітапта ХІХ ғасырдың соңында – ХХ ғасырдың басында қазақ қоғамына үлкен сілкініс әкелген Алаш қозғалысының Тарбағатай-Зайсан өңіріндегі қызметі, шығыс өлкедегі бай-болыстар мен Алаш қозғалысына жақтас, мүдделес болған қайраткерлердің өмір жолы мен қоғамдық-саяси қызметі туралы әр жылдары жазылған зерттеулер барын жеткізді.