Қазақ даласынан табылған Алтын адамдар: ақпараттық сағат

16 қараша күні Абай атындағы әмбебап кітапханасында Семей медицина университетінің шетелдік студенттеріне арналған «Қазақ даласынан табылған Алтын адамдар» атты ағылшын тілінде ақпараттық сағат өткізілді.

Ақпараттық сағат «Рухани жаңғыру» мемлекеттік бағдарламасы аясында ұйымдастырылды. Шара барысында шетел әдебиеттері бөлімінің маманы Пәкістан елінен келген студенттерге Қазақстанның ең құнды жәдігері – Алтын киімді адам туралы қызықты деректерді ағылшын тілінде баяндап берді. Есік қорғанынан табылған сақ ханзадасы және оның ғұрыптық кешені – құнды тарихи дереккөздері болып табылады. Ол Қазақстан үшін ғана  емес, бүкіл әлем үшін баға жетпес мұра. Ұлы даланың жеті қырының бірі. Уақыт өте келе бұл тарихи-мәдени мұраға арналған ғылыми зерттеулер негізінде құндылығы одан әрі арта түспек.

Ақпараттық сағат аясында шетелдік студенттер назарына Қазақстанның ғана емес, бүкіл әлемдік археологиялық қауымдастық үшін де үлкен сенсация болған Алтын адам туралы “The Golden Man of Kazakhstan” атты бейнеролик ұсынылды. Шара барысында көрсетілген «Қазақстан жерінен табылған ежелгі алтын бұйымдар» атты фотоальбом қатысушылар тарапынан аса қызығушылық тудырды.

Шара соңында шетелдік студенттерге Қазақстан жерінен табылған Алтын адам және қазақ халқының тарихы туралы білімдерін тексеру мақсатында викториналық сұрақтар қойылды. Белсенді түрде жауап берген студенттерге кітапхана атынан естелік кітаптар табысталды. Қатысушылар қазақтың тарихын, мідениетін шетелдік студенттерге таныту мақсатында ұйымдастырылған шара үшін кітапханаға өз алғыстарын білдірді.