Қаламгерлердің шығармашылық әлемі: кітаптар таныстырылымы
Абай атындағы облыстық әмбебап кітапханасында 2 желтоқсан күні драматург М. Ибраевтың туғанына 80 жылдығына және ақын, қоғам қайраткері, Қазақстан Жазушылар Одағының мүшесі Т. Жанғалиевтың туғанына 70 жыл толуына орай «Абай әлемі» кітаптар топтаммасымен жарық көрген ақындардың «Ғашықтың тілі», «Маңдайымның жазуы» атты кітаптарының таныстырылымы ұйымдастырылды. Шараға ақындардың замандастары мен қаламгерлер қатысып, олардың шығармашылықтары жайлы мол ақпарат берді.
Өлкемізден шыққан ағайынды қос ақынның шығармашылығынан мол мағлұмат беретін рухани шараға М. Әуезов атындағы педагогикалық колледждің студенттері қатысты.
Қара өлеңнің дарабозы, Қараулдағы қара шаңырақтың алтын қазығына айналған Төлеген Жанғалиев өзінің шығармашылық әлемі мен ағасы Мерғали Ибраевтің шығармашылығын таныстырды.
Рухани шарада алғашқы болып сөз алған зейнеткер, Абай ауданының құрметті азаматы, ҚР Оқу ағарту ісінің үздігі, ҚР Журналистер одағының мүшесі Молдабек Жанболатов ақындардың шәкірті екендігін айтып, ақындық жолға түскен бала ақындардың шығармашылық бейнелері көз алдында өткенін, кейін қызметте де үзеңгілес болғанын тілге тиек етіп, қызықты естелік-әңгімелерімен бөлісті.
Қос ағайынды ақынмен үзеңгілес, кезінде Абай ауданында партия қызметкері болған Екібаев Жақсыкелді Жиенбайұлы мен Абай ауданындағы Абай орта мектеп-гимназиясының ұзақ жылғы директоры қызметін атқарған Қуанышбаев Ғалым Айдарханұлы және жерлесі Семей қаласы ардагерлер кеңесінің төрағасы Мұрат Әлин ақындардың шығармашылықтарына кеңінен тоқталып, М. Ибраевтің драматургия саласына сіңірген еңбегі мен өлеңдеріне жазылған әндері жайлы баяндады.
Мерғали Ибраевпен ұзақ жыл қызметтес болған ақын, республикалық Абай журналының редакторы Оспанов Мұратбек Қабиденұлы журналистика саласында бірге еңбек еткен жылдардағы қызығы мен қиындығы мол қызметтегі жарқын күндерінен естеліктерімен бөлісті. Қаламгердің қаламынан туындаған полигон тақырыбына жазылған «Жоғалған өзен» шығармасының жазылуы жайлы маңызды әңгімелер айтты. Шарада ақындардың өлеңдері оқылып, әсем ән орындалды.
Ұлылар мекенінен шыққан ағайынды қос ақынның шығармашылығын жастарға таныстыру мақсатында ұйымдастырылған шара қатысушы жастар үшін тағылымы мол рухани кездесу болды.
