Балалықтан даналыққа: кітап таныстырылымы
4 желтоқсан күні Абай атындағы кітапханада психолог Сейілбек Мырзабаймен кездесу өткізіліп, оқырман қауымға автордың «Балалықтан даналыққа» атты жаңа кітабы таныстырылды. Жиынға қаламыздағы мектеп пен колледждердің мұғалімдері, психологтары және оқушылар мен ата-аналар қатысты. Шара барысында бала тәрбиесі мен қазіргі балалар психологиясының қыр-сырынан көптеген ғибратты да қызықты әңгімелер баяндалды. С.Мырзабай қатысушыларға онтология, соматика, ноология, фрустрация, экзистенциализм, интеллектуализм сияқты түсініксіз ұғымдарды қарапайым тілмен түсіндіріп берді. Автор жасөспірімдерге өзінің шынайы «Мен» деген ұғымды, өмірдегі мақсатын және жетістікке жету жолдарын түсінуге көмектесетін мамандандырылған балалар лагерінде қызмет еткен кездегі қиын жасөспірімдермен, олардың ата-аналарымен қарым-қатынас жасау тәжірибесімен бөлісті. Автор балаларды табиғат әлеміне араластыруға ерекше мән бөлу керектігін атап айтты. Бала өмірінің бұл аспектісі оның дамуына және баланың нейрондар желісін дамытуға көмектеседі. «Балалықтан даналыққа» атты кітаптың авторы балаларды кітап оқуға баулу, баланың әлеуметтік және психологиялық дамуына әлеуметтік желілердің әсері туралы мәселелерді көтерді.
Сондай-ақ С.Мырзабай басқа да қазақстандық авторлардың жеке тұлға ретінде дамуының ең қиын кезеңдеріндегі балалардың психологиялық және әлеуметтік дамуы мәселелерін қарастыратын бірқатар кітаптарын ұсынды. Шара соңында кітап авторы қатысушы мұғалімдер, ата-аналар және балаларды қызықтыратын өзекті сұрақтарға жауап берді.
