Тәуелсіздік – мәңгілік елдің тұғырығы: кең көлемді кітап көрмесі
16 желтоқсан – Қазақстан Республикасының Тәуелсіздік күні – тарихы тереңде жатқан елдің жаңа заманда өз алдына қайта егеменді ел болған күні.
9 желтоқсан күні Бизнес және сервис колледжінің «Өнеркәсіптік дизайнер» мамандығының 1 курс студенттеріне «Тәуелсіздік – ел тірегі» атты кітап көрмесіне шолу өткізілді.
Студенттерге тәуелсіздіктің тарихы мен оған жетудің ұзақ жолы таныстырылды. Көрменің бірінші бөлімі осыдан бір ғасырдан астам уақыт бұрын қазақ мемлекеттілігінің іргетасын қалаған «Алаш» қайраткерлеріне арналған. Бөлімде қазақ зиялылары – Алаш қозғалысы өкілдерінің тағдырын бейнелейтін кітаптармен, олардың қоғамдық-саяси қызметі туралы құжаттар жинақтары мен мұрағат материалдары ұсынылды. Олар: «Алаш рухы», «Алаштың рухани тарихы», «Аманаты Алаштың» энциклопедиясы және т.б. кітаптар. Келесі бөлімде көрме келген студенттер 1986 жылғы Желтоқсан оқиғасымен танысты. Мұнда Желтоқсан оқиғасының алғышарттары мен себептері, хронологиясы, мақалалары, жарияланымдары, құжаттары туралы мәліметтерді қамтитын «Желтоқсан көтерілісі», «Желтоқсан 1986 жыл», «Соңы репрессия» және т.б. кітаптармен таныстырылды.
Үшінші бөлімде қазіргі Қазақстанның тәуелсіздік жолын баяндайтын кітаптар ұсынылды: А. Морозовтың «Казахстан за годы независимости», «Древо независимости: от истоков к процветанию», «Тәуелсіздік шежіресі» және т.б. кітаптар.
Көрменің соңғы бөлімінде студенттер ақын-жазушылардың өнер туындыларымен танысты, олардың негізгі тақырыбы – Отанға, патриоттық рухқа, тәуелсіздікке арналған. Кітаптар арасында облысымыздың жас ақын-жазушыларының «Абай әлемі» сериясы бойынша жарық көрген басылымдары студенттерді ерекше қызықтырды – бұл «Жастықтың оты жалындап» атты жинаққа енген Бауыржан Игілік, Мерей Қарттың жыр жинақтары.
Кітап көрмесіне шолу экскурсиямен аяқталды, студенттер Қазақстандағы ең көне кітапхананың тарихымен, оның бөлімдерімен және қызметтерімен танысып, ұлы ақын, ойшыл Абай Құнанбаевтың оқыған кітаптарын қызыға тамашалады.
