Қарымды қаламгер: онлайн кездесу

Ағымдағы жылдың 13-ші желтоқсанында ZOOM платформасында, Абай атындағы облыстық кітапханасының ұйымдастыруымен Қазақстан Жазушылары Одағының Шығыс Қазақстан облыстық филиалының директоры, облыстық «Қазақ тілі» қоғамының төрағасы, С. Аманжолов атындағы университеттің құрметті профессоры, Катонқарағай және Өскемен қаласының Құрметті азаматы Әлібек Қалиұлы Қаңтарбаевтың 75 жас мерей тойы қарсаңында «Қарымды қаламгер» атты онлайн кездесу өтті.
Желідегі жүздесудің басын қалагердің өзі бастап, Семей жері өзіне ыстық екенін, жастық шағының осында өткенін айтып, қазіргі таңда бөлек орда Абай облысы болып жатқанына зор қуанышты екенін білдірді.
Өз кезегінде сөз алған, жазушының жерлесі, әрі бауыры, әрі замандасы, танымал қаламгер Әлібек Асылбайұлы Асқаров, аттас ағасы жайында ақтарылып айтып, сөздегі шеберлігі мен ойдағы ұшқырлығын, қаламдағы шыншылдығын жіпке тізіп, осы күнгі өзін жазушы санайтын кей азаматтардың повест дегендері Әлағамның жазған мақаласына жетпей қалып жататынын байқаймыз деп ағынан жарылды.
А.С. Пушкин атындағы ШҚО кітапханасының библиограф-өлкетанушы маманы, Мәдениет саласының үздігі Слямова Зиза Мұхтарханқызы Әлібек Қалиұлының жалпы Өскемен қаласына сіңірген зор еңбегіне тоқталып, қаланы қазақтандыруға салған күшін жоғары бағалады. Сонымен қатар Зиза Мұхтарханқызы қаламгердің кітапхана қорында бар кітаптарымен таныстырып, жазушының жалпы бағыты ақиқатқа бағытталатынын, шынайы деректі дүниелер жазатынын мәлімдеді.
Желідегі жүздесу соңында мерейтой иегері қатысушылар тарапынан қойылған сұрақтарға жауап беріп, оқырмандардың өтініші бойынша поэзиялық туындыларынан үзінділер оқып, кездесу ұйымдастырып отырған Абай атындағы кітапхана ұжымына зор алғысын білдіріп, сөзін аяқтады.