Аңсатып жеткен азат күн: желтоқсан куәгерлерімен кездесу

Ағымдағы жылдың 14-ші желтоқсан күні Абай аындағы облыстық әмбебап кітапханасы және «Ауыл» ХДПП ұйымдастыруымен «Аңсатып жеткен азат күн» атты желтоқсан оқиғасына қатысқан Семей қаласының азаматтарымен кездесу өтті.
Арнайы жүздесудің қонағы, желтоқсан оқиғасының куәгерлері Семей қаласындағы №3 орта мектептің қызметкері Байелов Ержан Шакенұлы мен №23 мектептің қазақ тілі мен әдебиеті пәнінің мұғалімі Жакупова Анар Оразгалиқызы болды.
Шараға Семей көпсалалы колледжінің студенттері, Темір жол полициясының қызметкерлері және «Ауыл» партиясының азаматтары қатысты.
Кездесу барысында қонақтарымыз жалпы оқиға қалай болғанын, сол кезде жастардың қалай рухтанғанын, елге деген махаббаттың күшімен қатал қыстың аязында аяусыз басшылықтың басқыншылық әрекетіне қалай қарсы тұрғандарын айтып берді.
Сөз кезегін алған Анар Оразғалиқызы сол уақыттағы замандас, қатарластарымен бірге алаңға дейін қалай жеткендерін айтып, сол кезеңдегі тарихи фото суреттерімен өзінің дайындаған слайдын қатысушылар назарына ұсынды.
Сұқбатты жалғаған Ержан Шакенұлы сол уақытта өзінің Алматы қаласында жұмыс істеп жүргенін, алаңға қазақ бауыр-қарындастарын қорғау үшін барғанын тиек етті.
Шара соңында кітапхана мамандары дайындаған желтоқсан оқиғасы туралы арнайы бейне материал көрсетіліп, кітапхана маманы Қуандық Кенжебекұлы «Біздің елдің жігіттері» әнін орындап берсе, кішкентай оқырманымыз Марклен Фатима «Мен Қазақпын» әнін шырқап берді.
«Ауыл» партиясының Абай облыстық филиалы төрағасының орынбасары Ақнұр Қайратқызы партия баспасынан жарық көрген «Алтын тұғыр» атты үш томдықты қонақтарымызға сыйға тартты.