Өмірін ғылыммен өрнектеген: кездесу кеш

15 желтоқсан күні Абай атындағы әмбебап кітапханасында белгілі тарихшы, ғалым, археолог, профессор Амантай Исаұлы Исиннің туған күніне байланысты «Өмірін ғылыммен өрнектеген» тақырыбында профессормен кездесу кеш өтті. Кешке мәдениет саласының үздігі, алаштанушы Қ. Ж. Нұрқасым, тарихи-өлкетану музейінің директоры Қ.Сабырбаев, Әлихан Бөкейхан университетінің оқытушысы, т.ғ.к. Аман Қапанұлы, М.Әуезов атындағы педагогикалық колледжінің оқытушысы Гауһар Каржасовна студенттерімен және Қаржы-экономикалық колледжінің студенттері, сонымен қатар «Ауыл» партиясының мүшелері қатысты.
Жүргізуші ғалымның Қайнар орта мектебінен бастап, Алматыдағы №25 орта мектепте оқығанын, бала кезінен өнер-білімге ерекше құмар болуының себебі әкесі Абралы өлкесіне танымал халық ақыны Иса Биназаров, ал анасы аты көпке мәлім болған Оспанқұл молданың қызы Хабида Әзбекова екенін атап өтіп, балалық шағынан ақпараттар берді.
Студенттік кездері мен тарих ғылымына қызығушылығын, Қазақстанда алғашқы болып Ортағасырлық деректерді Мәкеудегі көнедеректер архивіне барып зерттегенін, Қазақ хандығы мен Ноғай Ордасының қарым қатынастар тақырыбындағы кандидаттық диссертациясы туралы және 200 аса ғылыми еңбектері мен археология саласындағы экспедициялық жұмыстары хақында қатысушыларға ғалым өзі әңгімелеп берді.
Шара барысында Semei телеарнысының түсірген Амантай Исаұлына арналған “Адам.Уақыт.Оқиға” бағдарламасынан үзінді көрсетілді. Шараға қатысушы қонақтар Амантай Исаұлының тарих ғылымдары мен археологияға қосқан сүбелі еңбектерінің бір қатарын атап өтіп, ізгі ниеттерін білдірді.