Ай мен Айша: оқырмандар конференциясы

21 желтоқсан күні Абай кітапханасы Әлихан Бөкейхан университеті мен Семей медицина университетінің студенттерімен бірлесіп, халық жазушысы, қоғам қайраткері Шерхан Мұртазаның «Ай мен Айша» шығармасы бойынша оқырмандар конференциясын ұйымдастырды.
Конференцияның негізгі мақсаты мемуарлық романның мазмұнымен толық танысу, шығарманың идеялық құндылығын айқындау, басты кейіпкерлердің бейнесін ашу және кейіпкерлер болмысын танытудағы жазушы шеберлігіне талдау жасау.
Оқырмандар конференциясы барысында студент жастар Шерхан Мұртазаның өмірі мен шығармашылығы жайлы баяндама жасап, оның ішінде бір дәуірдің трагедиясы тайға таңба басқандай ашық суреттелген «Ай мен Айша» романы желісіне шолу жасады. Шығармада соғыс жылдарындағы аналардың, «41-ші жылғы келіншектердің» символына айналған Айшаның тағдырдың ауыр тауқыметін тартып, қиындыққа мойымай, айға сырын ақтарып, сыртқы жаумен емес, ішкі қас-дұшпанмен арпалысқандығы шебер суреттеледі.
Аталмыш шара аясында көркем шығармада суреттелген басты кейіпкерлерге талдау жасалды. Қатысушылардың біразы балалықпен ерте қоштасқан, кішкентай кезінен қиын-қыстау күндерді басынан өткізген, еңбекқор, өжет, туған жерге, адамдарға деген ізгілігін жоғалтпаған кейіпкер – Барсхан образына тәнті болса, енді біразы тағдыр талқысында жігері мұқалмай балаларына өмірлік тәлім-тәрбие берген, намысқой, төзімді қазақ әйелі – Айша бейнесі асқан шеберлікпен бейнеленгенін атап айтты. Конференция соңында қатысушылар шығарма желісі бойынша өз ойларын ортаға салып, романды оқу барысында алған әсерлерімен бөлісті.