Тұлғасы тұнған тәлім, есімі елге мәлім – Бауыржан Момышұлы: ақпараттық сағат

23-ші желтоқсан күні 36803 әскери бөлімінде облыстық Абай атындағы әмбебап кітапхананың ұйымдастыруымен Кеңес одағының батыры, жазушы, Екінші дүниежүзілік соғыстың даңқты жауынгері, әскери қолбасшы Бауыржан Момышұлының туған күні қарсаңында аталмыш әсери бөлімінде «Тұлғасы тұнған тәлім, есімі елге мәлім – Бауыржан Момышұлы» атты ақпараттық сағат өткізілді.
Шара барысында кітапхана қорындағы Бауыржан Момышұлының есімімен байланысты барша кітаптар, естеліктер, батырдың өз шығармалары, салған суреттері, сонымен қатар басылым беттеріндегі журналдар мен газеттер ұсынылды.
Ақпараттық сағатқа қатысушы жас сарбаздарға Бауыржан Момышұлы ел басына күн туып, ат ауыздықпен су ішіп, ер етігімен су кешкен кезде тоз-тозы шыққан халықтың етек-жеңін жиып, мүддесін қорғаған қаһарман, дара тұлға болғаны, қысылтаяң сәттерде де қазақтың намысын бәрінен жоғары қойып, қарсы алдындағы жаудан қаймықпаған қолбасшының арманы Тәуелсіздік болғаны айтылды.
Темірдей тәртіпте сап түзеген сарбаздарға шара соңында кітапхана мамандары дайындаған халық каһарманының өмір мен шығармашылығы, батырлығы мен батылдығы жайында бейнесюжет пен слайдтар көрсетіліп, «Күннің дәйек сөзі» ретінде Бауыржан Момышұлының ұранға айналған қанатты сөздері әрбір сарбазға жекелей таратылды.
Жиын соңында кітапханамыздың мамандары Сембаева Айсұлу Серікболқызы мен Қуандық Кенжебекұлы 36803 әскери бөлім командирі, полковник И. Карасартовтың Алғыс хатымен марапатталды.