Ғалым. Тұлға. Қайраткер: кітап көрмесі

Бүгін 5-ші қаңтар, КСРО Жазушылар одағының мүшесі, қоғам қайраткері, қазақ әдебиетінің абайтану мектебінің негізін қалаушылардың бірі, шәкәрімтанушы және Шәкәрім шығармаларын алғашқы насихаттаушылардың бірі, әрі жарыққа шығарушы, мұхтартанушы ғалым, жазушы, ақын, драматург, аудармашы Қайым Мұхамедхановтың туған күні.

Осынау атаулы күнге орай Абай атындағы облыстық әмбебап кітапханасының қызметкерлері «Ғалым. Тұлға. Қайраткер» тақырыбында оқырмандар назарына арнайы кітап көрмесін ұйымдастырды.

Сәулелі ғұмырында Қайым Мұхамедханұлы – Мемлекеттік сыйлықтың иегері, Қазақ ССР Гимнінің авторы, Семей қаласында Абайдың мемлекеттік музейін ұйымдастырушы, Абайдың ақындық мектебі мен Қазақстандағы текстология ғылымы, шәкәрімтану және алаштану ғылымдарының негізін қалаған көрнекті ғалым, 1000-нан аса ғылыми еңбектің авторы, КСРО және Қазақ ССР Халық ағарту ісінің үздігі, Шығыс Қазақстан облысының Семей, Аягөз қалалары, Жаңасемей және Абай аудандарының Құрметті азаматы атанды.

Көрмеге есімінің өзі ел есіне еңбегімен түсетін Қайым Мұхамедханұлының қаламынан туындаған барлық зерттеулері, анықтамалары, алаштану, абайтану, мұхтартану, шәкәрімтануға байланысты еңбектері, Қайым Мұхамедханов 10 томдығы, мерзімді басылымдар бетіндегі мақалалары мен тұжырымдамалары оқырман назарына ұсынылды. «SEMEI» жергілікті телеарнасына XX ғасыр басынан қазақ халқы басынан өткерген небір нәубеттерді көріп, зердесіне түйген бала Қайым Алашқа ниеттес болған әкесі Сейітқұл Мұхамедхановтың қара шаңырағына ат басын тіреген Ә.Бөкейханов, А.Байтұрсынов, М.Дулатов сынды арыстардың зерделі әңгімелерін көкейіне құйып, қайраткерлік тұлғасы  бала кезден мығым қалыптасқандығы туралы сұхбат берілді.