Қазақ аналары дәстүрге жол: Семей филиалының ашылу салтанаты

5 ақпан күні Абай атындағы  кітапханада  келер ұрпаққа қазақтың салт дәстүрін, мәдениетін, ана тілін, өнерін дәріптеп, ұлттық киіміміз бен әжелердің ақ кимешегін насихаттап жүрген  «Қазақ аналары дәстүрге жол» қоғамдық бірлестігінің Семей  филиалының ашылу салтанаты болып өтті.

Шараға Астана қаласындағы   «Қазақ аналары дәстүрге жол» қоғамдық бірлестігінің төрайымы Айнұр Жүгінісова, Алматы, Петропавл, Жамбыл және т.б қалалар мен аудандардан  келген аталмыш қоғамдық бірлестіктің төрайымдары,  әжелер ансамблі,  Б.Момышұлы атындағы қаламыздағы №34 орта мектептің жас ақындары  мен қала тұрғындары қатысты.

Қонақтарға 1883 жылы ашылған кітапхананың тарихы және Абай Құнанбайұлының кітапхананың  алғашқы оқырмандарының қатарында болғандығы туралы мағлұматтар берілді. Қаламызда сол заманда жұмыс істеп тұрған «Императорлық Орыс Географиялық қоғамы  Батыс-Сібір бөлімінің Семей Бөлімшесі», «Облыстық санақ комитеті», «Бастауыш білім беру қоғамының» есеп беру құжаттарындағы   Абай Құнанбайұлының  қоғам өміріне белсене араласқаны жайлы деректермен таныстырылды. Шараға қатысушылар XX ғасырдың басында жарық көрген ұлт зиялыларының шығармаларына ерекше назар аударды.

Сонымен қатар, халқымызға орны толмас қайғы әкелген, ядролық жарылыстар алаңына айналған Семей полигоны туралы  мол мағлұматтар беретін  «Семей полигоны – ұлт қасіреті» тақырыбындағы  көрмеге шолу жасалып, ақпараттар беріліп, слайд материалдары ұсынылды.

Шара соңында кітапханашы маман Қуандық Кенжебек кимешек киген әжелерімізге тамаша арнауын жолдады.