Ақын. Ғалым. Абайтанушы: кездесу кеш

8 ақпан күні Абай атындағы кітапханада Қазақстан Жазушылар және Журналистер одағының мүшесі, ақын, аудармашы, абайтанушы-ғалым Сұлтанбеков Мұрат Рақымжанұлының 85-жылдық мерейтойына орай «Ақын. Ғалым. Абайтанушы» атты кездесу кеші ұйымдастырылды.
Шараға тарихшы ғалым, Шәкәрім университетінің профессоры А.И. Исин, ветеринария ғылымдарының докторы, профессор, ҚР білім беру ісінің құрметті қызметкері, Қазақстан Ұлттық жаратылыстану ғылымдары Академиясының академигі, «Құрмет» орденінің иегері З.Қ.Тоқаева, ақынның замандастары, және Байланыс колледжінің студенттері қатысты.
Кеш қонағы Мұрат Сұлтанбеков қатысушыларға өзінің балалық шағы, Семей педагогикалық институтында өткен қызықты студенттік өмірі мен Мәскеу қаласында оқыған жылдары туралы, сонымен қатар шығармашылыққа, аударма өнеріне қалай келгендігі жайлы баяндады.
Кездесу барысында қаламгердің ұшқыр қаламынан әр жылдары жарық көрген бай шығармашылық мұрасы мен әдебиеттану ғылымына қосқан үлесі жайында кеңінен әңгімеленді. Бірге қызмет жасаған әдебиет саласында жүрген үзеңгілес достары қаламгердің шығармашылық өмірі, қызмет жолында талай шәкірт тәрбиелеуге қосқан үлесі, Абай, Шәкәрім шығармаларын орыс тіліне тәржімалғандығы жайында өз ойларын ортаға салды.
Шара барысында Мұрат Сұлтанбеков өзінің қаламынан туындаған бірнеше өлеңдерін оқып, оның шығармашылығына ұстазы, белгілі абайтанушы, профессор Қайым Мұхамедхановтың ықпалы зор екенін атап өтті.
Шығармашылық кеш аясында кітап көрмесі ұйымдастырылып, оған Мұрат Сұлтанбековтың кітаптары, әр жылдары баспасөз беттерінде жарық көрген мақалалары мен өмірінен сыр шертетін суреттері қойылған.