Соғады жүрек: әдеби танымдық кеш

Жыл сайын ақиық ақын Мұқағали Мақатаевтың туған күніне орай ақынды еске алып, шығармашылығын оқырман қауымға таныстыру кітапханамызда дәстүрге айналған.
Ақын шығармашылығына ынтық, поэзия сүйер жастар 9 ақпан күні әдеттегідей кітапханамызға жиналды. Ақын шығармашылығын кеңінен насихаттауға арналған «Соғады жүрек» атты әдеби танымдық кеш Жастар ресурстық орталығымен бірлесіп ұйымдастырылды.
Шараға қатысушы жастарды кітапхана қорындағы ақынның кітаптары мен мерзімді басылымдар беттерінде жарияланған мақалалардан дайындалған «Бүгін менің туған күнім…» атты кітап көрмесі қарсы алды. Көрмеден орын алған ақынның шығармалар жинағы және мерзімді басылымдар беттерінде жарияланған ақын шығармашылығы жайлы тың мақалаларына библиографиялық шолу жасалынды.
Кеш барысында ақын Б. Игілік ақынның өмір жолы, шығармашылығы туралы ойларымен бөлісті. Шәкәрім атындағы университеттің студенттері Мұқағали өлеңдерінен жыр шашып, ашық микрофон ұйымдастырды. Кешке қатысушы жастар М. Мақатаев өлеңдерін оқып, жас ақын Темірлан Темірбай өз шығармашылығынан жырдан шашу шашты.
Ақын Б. Игілік М.Мақатаевтың сөзіне жазылған Табылды Досымовтың «Ұнатамын мен сені» әнін, М. Төлебаев атындағы музыкалық колледждің студенті Дүйсенғазин Ғалымжан М. Мақатаевтың сөзіне жазылған «Шеше сен бақыттысың» әнін орындады.
Шара соңында қатысушылар ақиық ақын шығармашылығы туралы өздерінің ойларымен бөлісті.