Парасаттылық деген не?: әңгіме диалог

Ақпан айының 10-ы күні Абай атындағы облыстық әмбебап кітапханасының ұйымдастыруымен «Парасаттылық деген не?» тақырыбында М.Әуезов атындағы колледждің «Шет тілі» мамандығының студенттерімен әңгіме диалог өткізілді.
Шараның қонағы Ә.Бөкейханов университетінің профессоры, философия ғылымдарының кандидаты Түйебаев Махмұт Мамырбекұлы болды.
Парасаттылық – адам бойындағы кісілік қасиет. Парасаттылық ұғымы ақылдылық пен білімпаздық, мәдениеттілік, көрегенділік, зерделілік мағынасында қолданылады. Парасатты адамға адамгершілік, инабаттылық, салиқалылық, мейірімділік, ізгілік, әдептілік, ұстамдылық, талғампаздық қасиеттері тән.
Диалог әңгіме барысында Махмұт Мамырбекұлы қатысушы жастарға тарихи тұлғалардың өмірінен мысал келтіре отырып, жер бетіндегі адамға тән жақсы қасиет пен адами құндылықтың бәрі парасатты тұлғаны қалыптастыратынын айтты. Сонымен қатар, адамның дүние-өмір танымдық қуат көзі, нағыз адамдықтың негізі нәзік болмыс –ақыл, ес, ой – өріс, жад, түйсік және сезім екенін, мінез-саналы өмір жүйесінде нәзік болмыспен қабаттас дарыған, адамның табиғи қалпы, сыр-сипат, іс-әрекет, бет-бағдар ерекшеліктерінің психологиялық жиынтығы болатынын түсіндірді. Ақыл мен мінез кісіліктің парқын, парасаттылығы мен бітім-келбетін, өмірге жарасымдылығы мен қабілеттілігін анықтаушы, сондай-ақ бірін-бірі толықтырушы, жетілдіруші саналық категория деп түйіндеді.
Шара соңында қатысушылар парасаттылық жайында өздерінің пікірлерін білдіріп, қонағымызға әр түрлі сұрақтарын қойып, соның жауабын бірге қарастырды.