Ұлт асылының ұрпағы, қазақ елінің мақтанышы: әдеби кеш

Абай атындағы кітапханада мемлекет және қоғам қайраткері,  Қазақстанның еңбек сіңірген қайраткері Мұрат Әуезовтің 80 жасқа толуына байланысты «Ұлт асылының ұрпағы, қазақ елінің мақтанышы» тақырыбында әдеби кеш өткізілді.

Шараға қатысушы  Геологиялық-барлау колледжі мен Ж.Шайжүнісов атындағы электронды колледж студенттерін «Замандарды жалғастырған заңғар» тақырыбындағы кітап көрмесі қарсы алды. Студент-жастарға көрмеден орын алған  автордың отбасы, әр  жылдардағы мақалалары, түрлі басылымдарға берген сұхбаттары, жайында кеңінен ақпарат берілді. Қатысушыларды айтулы тұлғаның өмірі мен шығармашылығы және отбасына қатысты маңызды ақпараттармен таныстыру үшін  Қазіргі заман тарихын құжаттандыру орталығының бөлім меңгерушісі Лаура Қадырова мен Шәкәрім атындағы мемлекеттік университетінің магистранты Айгерім Нұржановалар шақырылды.

Әдеби кеш «Мұрат Әуезов кім?» деген тақырыптағы видеороликпен басталды.  Кітапхана маманы Ж.Чушекова Мұрат Әуезовтің балалық  және студенттік шақтары, қоғамдық-саяси және мәдени мәселелерді шешудегі үлесі жайында кітапхана қорында сақталған материалдар бойынша мол мағлұматтар берді.

Қазіргі заман тарихын құжаттандыру орталығының бөлім меңгерушісі Лаура Қадырова «Мұхтар Әуезовтің Семейдегі кездері» жайында архивте сақталған құнды деректер жайында маңызды ақпараттарды ұсынды. Шәкәрім атындағы университет магистранты Мұрат Әуезовтің анасы Фатима Ғабитова туралы ойларымен бөлісіп, қаламгердің анасы жайында жазылған басылымдарды оқуға кеңес берді.

Геологиялық-барлау колледжінің «Гауһартас» үйірмесінің мүшелері Абайдың «Мен жазбаймын өлеңді ермек үшін», «Жасымда ғылым бар деп ескермедім», «Ғылым таппай мақтанба» өлеңдерін оқыды. Мұрат Әуезов жайында деректі фильмнен үзінді көрсетіліп, қаламгердің сұхбаты оқырман назарына ұсынылды.