Б. Момышұлының «Ұшқан ұя» кітабы: талқылау

  • 28.02.2023

26 ақпан күні Абай атындағы кітапханада «Сұхбат» әдеби клубының кезекті отырысы өтті. Клуб  мүшелері Б. Момышұлының «Ұшқан ұя» кітабын талқылады.

Бауыржан Момышұлының «Ұшқан ұя» романы автордың мемуарлық шығармасы. Шығармаға автордың балалық шағынан, ес біле бастаған, мектеп табалдырығын аттағанға дейінгі өмірі өзек болған. Жазушы өзінің тұлға ретінде қалыптасуына ұшқан ұясы ықпал еткенін баяндай отырып, отбасы мүшелерін: әжесі Қызтумас, әкесі Момыш, немере ағасы Момынқұл, әпкелері Үбиан, Әлимандарды өзіндік бейнелерімен әр қырынан танытқан. «Ұшқан ұя» романы – мемуарлық шығарма ғана емес, қазақтың салт-дәстүрі, ғұрпы, ұстанымы, дүниетанымы әсерлі бейнеленген этнографиялық шығарма.

Клуб мүшелері Б. Момышұлының тұлға ретінде қалыптасуына ықпал еткен ұшқан ұясы жайында айта отырып, қазақтың салт-дәстүрі, дүниетанымы кейінгі ұрпаққа өнеге екенін тілге тиек етті. Зейнеп Ахметованың «Шуақты күндер» кітабындағы Б. Момышұлы бейнесінің тағы бір қыры жайында, күнделік ретінде жазылған бұл кітаптың өзінен ата мен келін арасындағы қарым-қатынастың өнегелі үлгісі аңғарылатыны сөз болды.

Клуб мүшелері келесі айда оқуға Ә.Нұршайықовтың «Ақиқат пен аңыз» кітабын талқылауды таңдады.