Шәкірім оқулары: облыстық байқау

Абай атындағы кітапханада Шәкірім Құдайбердіұлының туғанына 165 жыл толуына орай Астана қаласындағы ҚР Ұлттық академиялық кітапханасы ның бастамасымен «Шәкәрім оқулары» атты ақын өлеңдерін жатқа айту республикалық байқауына іріктеу кезеңі ұйымдастырылды.
Шәкірім бабамыздың шығармашылығын танып, зерттеуге ынталандыру, ұлттық құндылықтарды насихаттау мақсатында ұйымдастырылған облыстық байқауға Абай облысына қарасты кітапханалардың жас оқырмандары, яғни мектептің 5-7 сынып оқушылары қатысып, өз білімдерін сынады.
Облыстық байқаудың «Талап» атты бірінші кезеңі бойынша қатысушы жас оқырмандар Шәкәрім қажының 20 өлеңін жатқа айтса, 2-ші «Білім» сұрақ-жауап кезеңінде оқушылар ақын шығармашылығы бойынша қойылған сұрақтарға жауап берді. Байқаудың 3-ші «Таза ақыл» кезеңіне іріктелген оқушылар қазылар мүшелерінің берген сұрақтары бойынша ақын өлеңдерінің мазмұнын айтып, өлеңдерінде кездесетін сөздердің мағнасын түсіндірді.
Ақпан айының 27-сі күні Абай облысына қарасты аудандар мен ауылдық елді мекендердің оқушылары арасында ұйымдастырылған онлайн-байқаудың қорытындысы бойынша Абай ауданынан қатысқан Әлібек Қайырбеков, Сабина Сүлейменова, Ақсуат ауданынан Ақниет Оразғалиева, Үржар ауданынан Абылай Талғатов, Жарма ауданынан Нұрдәулет Оразғазы, сынды оқушылардың дайындығын ерекше атап өтуге болады.
Ақпанның 28-і күні Семей қаласы мектептерінің оқушылары арасында өткен офлайн-байқау қорытындысы бойынша Шәкәрім атындағы көпбейінді №5 гимназияның оқушысы Даяна Қайырбек пен «Жасұлан» лектеп-лицейінің оқушысы Нұрдәулет Дәулетов өздерінің терең білімдері мен ерекше қабілеттерін көрсете білді.
Екі күндік байқаудың 3 кезеңі бойынша қатысқан оқушылар тиісті марапаттармен марапатталып, Абай ауданы Ш.Тоқжігітов атындағы орта мектептің 5 сынып оқушысы Әлібек Қайырбеков ҚР Ұлттық академиялық кітапханасының ZOOM платформасы арқылы 6 наурызда ұйымдастырылатын онлайн байқауына жолдама алды. Жерлесімізге сәттілік тілейміз!