Қасиет бар қаламда мен білмеген: онлайн-кездесу

Абай атындағы облыстық кітапханада еліміздегі жас қаламгерлер шығармашылығын көпшілікке насихаттау бағытында ұйымдастылыған «Жастықтың оты жалындап» жобасы өз жалғасын тапты. Жоба аясында 27 ақпан күні журналист-жазушы, облыстық “Қостанай таңы” газетінің тілшісі Бибіт Мирамұлы Нұрмұхановпен «Қасиет бар қаламда мен білмеген» тақырыбында онлайн-кездесу өткізілді.
Жас қаламгер кездесу барысында 2015 жылдан бастап облыстық “Қостанай таңы” газетінде жас тілші, штаттан тыс тілші қызтерін атқарып жүргендегі жайлы айтып, өзінің алғашқы шығармашылық жолын таныстырды. Проза саласындағы шағын әңгімелерін, новеллаларын, өлеңдерін, мақалаларын облыстық, республикалық белді баспа беттері мен әлеуметтік желілерге жариялап тұратындығына және тырнақалды туындыларының мазмұнына тоқталды. Мистика, фантастика, тылсым оқиғаларға құрылған әңгімелері жайлы баяндады.
Қазіргі уақытта Қостанай жеріндегі әдеби орта туралы әңгімелеп, үлкен буынның орта буынды, орта буынның үлкен буынды қолдауы және тығыз шығармашылық қарым-қатынастары жайлы айтты. Қостанайда жерлестерімен жиі бас қосып, бір-бірінің шығармашылықтарын талқылайтындарын айтып, жалпы өз өңіріндегі әдеби ортаға көңілі толатындығын жеткізді. Жас қаламгерлерге жасалып жатқан ізгілікті істерге тоқталды. Кездесу барысында қойылған орамды сұрақтарға жауап берді.
Шара соңында 2022 жылы “Балалар жылына” орай Қазақстан Жазушылар одағының алғыс хатымен және 2021 жылы облыстық әдеби байқаудың 1-ші орын жүлдегері атанған жас қаламгерге шығармашылық табыс тілеп, шығармашылығының шыңдала беруіне тілектес болдық.