Күнбатыс Алашорда: онлайн лекция
Абай атындағы кітапханада 1-ші наурыз күні «Алаш» жобасы аясында ZOOM платформасында белгілі жазушы, Қазақстан Жазушылар және Журналистер Одағының мүшесі Мұнайдар Мұқамбетжанұлы Балмолда «Күнбатыс Алашорда:» тақырыбында онлайн-лекциясын өткізді.
Аталмыш шарада Алашорданың Батыс бөлімінің құрылуы мен қызметін сол тарихи кезеңнің қоғамдық-саяси, әлеуметтік–экономикалық дамуы туралы ой-тұжырымдарымен бөлісті.
Алашорданың Батыс бөлімшесін кұру туралы шешімге Ә. Бөкейханов қол қойғандығын және төрағасы Жаһанша Досмұхамедов тағайындалғандығы туралы ақпаратпен хабардар етті. Алаш қайраткерлерінің білімдарлығына тамсана отырып, олардың кем дегенде 7-8 тіл меңгергендігі және Күнбатыс Алашорда тәуелсіз үкімет ретінде 578 күн өмір сүргендігі туралы да айтып өтті.
Эфир қонағы өзінің «Дала көкжалы» атты көркем туындысы Ж.Досмұхамедұлының өмірімен тығыз байланысты екендігіне тоқталды. Романның желісі кейіпкердің балалық шағынан өмірінің соңына дейінгі кезеңді суреттейтіндігін айтып, қайраткердің өз заманында қазақ халқын аман-есен сақтап қалу мақсатында күресіп, Батыс Алашорда бөлімінде «Халық милициясы» атты әскери жасақ құрғандығы туралы ақпарат берді. Шара барысында, осы кітапты жазу кезінде Алаш қайраткерлері жайында тарихи деректерге, кинофильмдер мен әдеби кітаптарға сүйенгендігін баяндады. Аталмыш кітапты жазуға автор өзінің 17 ай жұмсағанын айтып өтті.
Шараға қатысушылардың көркем туындыны жазуға не себеп болғандығы, қайраткер тұлғасын дәріптеуде қазіргі уақытта атқарылып жатқан іс-шаралар және сақталған фотосуреттері жайында қойылған сауалдарға жауап берді.
Автор шара соңында өзінің «Дала көкжалы» кітабын сыйға тартып, «Алаш» электронды кітапханасының қорына цифрлы нұсқасын орналастыруға рұқсат ететіндігін жеткізді.
