Танымал әйелдер тағдыры: кең көлемді кітап көрмесі

8 наурыз – Халықаралық әйелдер мерекесі қарсаңында Абай атындағы кітапханада «Танымал әйелдер тағдыры» тақырыбында кең көлемді кітап көрмесі ұйымдастырылды.

Мәдени шараға «Қазақ аналары – Дәстүрге жол» республикалық қоғамдық бірлестігінің мүшелері, ҚР ІІМ Көліктегі ПД Семей станциясындағы желілік полиция бөлімі қызметкерлері және М.Төлеубаев атындағы музыкалық  колледжінің студенттері  қатысты.

Шара барысында  жанқиярлық ерлігімен талайды тәнті еткен,  өнерімен ақыл-парасатымен ел есінде мәңгі сақталған қазақ әйелдерінің өміріне қатысты кітап беттеріндегі қызықты деректер топтамасы кітап көрмесіне қойылған басылымдар арқылы  пайдаланушылар назарына ұсынылды.

Сонымен қатар нәзік жандардың тағдыры туралы сыр шертетін кітап көрмесінен «Ұлы даланың ұлы қыздары», «Қазақ тарихындағы әйелдер» И.Серкебаеваның «Бибігүл Төлегенова», «Ақ үйдің бірінші ханымдары», «Күйші Дина», «Қаһарман қыз Хиуаз» атты тамаша туындылар және қазақ жазушыларының әйел тақырыбына арналған шығармалары, сондай-ақ, нәзік жандар туралы  «Аңыз адам», «Жұлдыздар отбасы», «Қазақстан әйелдері», «Парасат» т.б. мерзімді басылымдар беттерінде жарық көрген мақалалар орын алды.

Пайдаланушыларға мәдениет пен өнер, білім және медицина саласының танымал әйелдері туралы жазушылар мен ақындардың жинақтарына, басты кейіпкерлері әйелдер болған шығармаларға библиографиялық шолу жасалды.  «Ботагөз», «Гауһар тас», «Қамар сұлу» т.б. шығармалармен қатар қазақ әдебиеті мен тарихындағы қазақ әйелінің бейнесі суреттелген шығармалар туралы ақпараттар берілді. Қазіргі әдебиет әлеміндегі Кемелбаева, Р.Мұқанова, А.Бақтыгереева, К. Ахметова, Ф. Оңғарсынова, Ш Құмарова т.б. туындылары жайлы баяндалды.

Кітап көрмесін Семей өңірінің көрнекті арулары портреттерінің фотогалереясы толықтырды.

Құрметті оқырмандар, Сіздерді 8 Наурыз – Халықаралық Әйелдер күнімен құттықтаймыз!

Көңілдеріңіз көктемдей болып, өмірлеріңіз мәнді, сәнді болсын!