Абай оқыған әдебиеттер әлемі: сирек басылымдар көрмесі

Абай атындағы облыстық кітапханамызға арнайы ат басын тіреген қаламыздағы Шәкәрім атындағы университеттің студенттері кітапхана тарихымен, қызметімен, оқырмандарға қызмет көрсету мазмұнымен кеңінен танысып, кітапханаға оқырман ретінде тіркелді.
«Абайдың рухани орталығында» болып сирек басылымдарымыздың жауһар қорларынан ұлы ақынға рухани нәр берген әдебиеттер әлемі жайлы толық ақпарат алу мүмкіндігіне ие болды.
Көне кітап мұраларының Абай заманынан бері жақсы сақталып келе жатқаны, ғылым салаларынан аса бай қорымыздың байлығы жас буын өкілдерін таң қалдырып, тартымды тарихымен өзіне баурады. Ұлы ақынның қайраткерлік тұлғасын айқындайтын өлкетану басылымдары, кемеңгер ойшыл пайдаланған батыс еуропаның Дрэпер, Милль, Спенсер сынды ғалымдары мен Гете, Байрон, Шиллер сияқты көркем сөз зергерлерінің, орыс классиктерінің інжу-маржандары, бай анықтамалықтар қоры оқырман қызығушылығын туғызды. Әсіресе Абай жайлы жазылған сирек дереккөздер жас оқырмандар назарын ерекше аударды. Мол ақпараттарға қаныққан қонақтарымыз үлкен ризалық сезіммен алғыстарын білдірді.