14 наурыз – Көрісу күні, Амал мерекесі: танымдық кеш

14 наурыз – Көрісу күні, Амал мерекесі.  Көрісу – халқымыздың көне дәстүрінің бірі. Көрісудің басты ұғымы – өткен қыстан, жылдан аман-есен шықтық, жаңа жылға, табиғаттың жап-жасыл түске бөленіп, жасарар шағы – көктемге жеттік дегенді білдіру.  Көрісу күнінде ешкім ешкімді шақырмайды. Бірақ жастардың үлкенге сәлем беріп, көрісуі – парыз деген халқымыздың арасында маңызды қағида бар. Осы мереке күнін жастар арасында кеңінен насихаттау мақсатында Абай атындағы кітапхана мен Семей жастар ресурстық орталығы  «14 наурыз – Көрісу күні, Амал мерекесі» атты тақырыпта жастар ресурстық орталығымен бірлесіп  танымдық кеш ұйымдастырды.

Іс-шараға  қатысқан Шәкәрім атындағы университетінің  және Геологиялық барлау колледжінің студенттерін  «Наурыз – достық пен гүлденудің мерекесі» тақырыбындағы кітап көрмесі қарсы алды.

Іс шараға Әлихан Бөкейхан университетінің оқытушысы, тарих ғылымының кандидаты – Аман Қапанұлы Рахметуллин қатысып, студенттерге Көрісу күнінің әні мен маңызы туралы әңгімеледі. Бұл күні қазақ халқы бір-бірінің үйіне барып, өкпе-реніштерін ұмытып, бір-біріне жақсылық тілейтіні жайында айтты. Ең алдымен әулеттің үлкендеріне барып, сәлем беріп көрісіп, кәде-сыйларын беріп, бір-бірінің көңілдерін аулап, жаңа жылдың келуіне қуанып, Бір жасың құтты болсын!» деп бір-біріне тілек айтатыны жайында баяндады.

Кеш барысында музыкалық колледж студенті Ғалымжан Дүйсенғазин өз репертуарынан ән шырқады.