Ербол Жұмағұловпен шығармашылық кездесу

Ағымдағы жылдың 27-ші наурызында кітапханамыздың ұйымдастыруымен заманауи ақын, кинорежисер Ербол Жұмағұловпен еркін форматта шығармашылық кездесу өтті. Шараны Е.Жұмағұлов  өзінің «Ерболдинская осень» кітабындағы өлеңдерімен бастады.

Кездесуге Семей медицина университетінің, М.Әуезов атындағы педагогикалық колледждің, М.Төлебаев атындағы музыкалық училище студенттері қатысты.

Әртүрлі тақырыпта қалам тербеген ақынның өзіндік сүрлеуі қалыптасқан. Шара барысында ақын өзінің басынан кешкен оқиғаларын, әдеби талпынысын, кино саласына қалай келгенін кеңінен баяндап берді.

«Намыс» республикалық футбол командасының үздік ойыншысы, Спорт және туризм академиясының түлегі Ербол Жұмағұлов мырзаның «Свобода слова» газетінде жұмыс істеп жүрген кезінде сценарий жазу туралы ұсыныс түсіп, арнайы білімі болмаса да кинорежиссер мамандығының  майталманына айналғанын өз ауызынан естідік.

Өзінің ең алғашқы ауқымды туындысы «Қазақфильм» жетекшілігімен жарық көрген «Кітап» көркемфильмінің  әлемдік премьерасы 2013 жылдың қазан айында Оңтүстік Кореяның Пусан қаласында ұсынылғанын, сонымен қатар Даккадағы халықаралық кино фестивальінде үздік деп танылғанын білдік.

Ербол Жұмағұлов поэзия мен қатар проза саласында да өзін сынап көргенін,  саясаткер Досым Сатпаевпен бірге «Легенда о „Номенклатура“» сатиралы роман жазғанын айтты.

Кездесу соңында ақын  Хакім Абайдың өлеңдерін және қара сөздерін  орыс тіліне аса  шеберлікпен аударып, кітап шығарғанын қатысушы студенттер назарына ұсынды. Осы күнге дейінгі Абай сөзінің орыс тіліндегі аудармаларында қателіктер көп екенін, Абайды басқа тілге аудармас бұрын оны өз тілінде дұрыс түсіну керектігін басып айтты.

Кездесуден қатысушылардың барлығы зор әсер алып, студент жастар тамаша көңіл-күймен тарқасты.