Қазақстан музыкасындағы жарқын із: еске алу кеші

Наурыз айының 30-шы жұлдызында Абай атындағы облыстық кітапханасында белгілі композитор, дүниеден ерте озған талантты тұлға Жолан Дәстеновтың туғанына 80 жыл толуына орай «Қазақстан музыкасындағы жарқын із» еске алу кеші өтті.
Кеш барысында талантты тұлғаның өмірдегі замандас жолдастары, өнердегі үзенгілес, қатарлас құрбылары келіп қатысып шығармашылық шеберханасын, өнерін, өмірдегі өрісін, жанұялық жағдайын, жеке басының тағдырын әңгімеге арқау етті.
Қонақтардың ішінде белгілі әнші, мәдениет қайраткері, сазгер, сатирик – Аймұхамбет Бейсембеков бастаған, Қазақстан композиторлар одағының мүшесі, ҚР еңбек сіңірген қайраткері – Қадір Досымжанов, Қазақстан композиторлар одағының мүшесі – Мәуліт Рахымбаев, Қазақстан Республикасының еңбек сіңірген қайраткері – Серік Малаев және Күлтіманов Сансызбай Махмерович сынды азаматтар қатысып жастарға талантты тұлғаның тағылымды тағдырынан сыр шертті.
Шарада Жолан Дәстеновтың Қазақ филармониясында лектор, Алматы консерваториясында оқытушы, Қазақ телевизиясында музыкалық бағдарламалардың бас редакторы, Қазақстан композиторлар одағының Ертіс өнірі бойынша бөлімшесінің төрағасы болып, өлшеулі ғұмырында, елеулі еңбек еткені жайлы айтылды.
Кеш соңында сазгер Қадір Досымжанов досына арналған «Дәурен-ай» атты күйін орындап берді.