Шәкәрімнің көркемдік танымындағы «мен» және «сен»: онлайн-лекция
Биыл ғұлама ғалым, ақын, ойшыл Шәкәрім Құдайбердіұлының туғанына 165 жыл толады. Осыған орай ақынның шығармашылығын насихаттау мақсатында Абай атындағы кітапханада «Алаш» жобасы аясында ZOOM платформасында филология ғылымдарының кандидаты, Астана Халықаралық университетінің доценті, шәкәрімтанушы ғалым Айнаш Байкенжеқызы Сейсекеновамен «Шәкәрімнің көркемдік танымындағы «мен» және «сен» тақырыбында онлайн-лекция ұйымдастырылды.
Шара қонағы Шәкәрім Құдайбердіұлының Абайдан кейінгі кезеңдегі қазақ әдебиеті тарихындағы ең жарқын тұлғалардың бірі екендігіне және оның мұралары 19 ғасырдағы қазақ әдебиетінің қорын толықтырғандығына тоқталып өтті.
Ойшылдың өмірі мен қайраткерлік, шығармашылық қызметінің мәнді де, маңызды кезеңдеріне қатысты әдеби-тарихи еңбектеріне тоқталды. Шәкәрім қажының ар ілімінен дәлелді дәйектер келтірді. Шығармашылық мұрасында адамның адамгершілік қасиеттерін дәріптейтін шығармалар көптеп кездесетіндігі туралы ақпарат берді.
Шығармалық өнерінде Шәкәрім Абай қандай бағыт ұстанса, сондай бағыт ұстанғандығын, барлық шығармаларының идеясы қазақ қоғамын еңбекке, мәдениетке, адамгершілікке, әділдікке шақыру болғандығына тоқталып, талдау жасады. Ақынның философиялық көзқарасы адам өмірін революциялық жолмен емес, жан мен рухани қажеттіліктерді жақсарту арқылы өзгертуге болады және жаңа қоғам құру үшін адамдарды моральдық тазарту қажет деп санағандығы туралы басып айтты.
Шара соңында әдебиеттану саласындағы Шәкәрім поэтикасы, шығармаларының көркемдік танымының тағылымы мол екендігін атай отырып, ақын шығармаларын әлі де зерттеу қажет ететіндігімен ойын тұжырымдады.
