Төлен Әбдік «Қонақтар»: оқырмандар конференциясы

Балалар әдебиеті бөлімінің қызметкерлері 2023 жылы «Бір ел – бір кітап» республикалық акция аясында оқуға ұсынылған қазақ жазушысы, драматург, қоғам қайраткері Төлен Әбдіктің, шоқтығы биік туындыларының бірі – «Қонақтар» шығармасы бойынша конференциясы өткізілді. Ұлттық әдебиетті оқуға деген қызығушылықтарын арттыру мақсатындағы ұйымдастырылған шараға Т.Аманов атындағы №16 орта мектептің 7 сынып оқушылары қатысты.
Төлен Әбдік – қазақ прозасында ерекше қолтаңбасы бар қаламгер. Тұңғыш рет 1969 жылы «Көкжиек» әңгімелер жинағы жарық көріп, қазақ әдебиетіне философиялық проза жанрын ала келген белгілі жазушы ретінде танымал. Т. Әбдікұлының шығармалары адам мінезінің құпия сырларына үңілуі, өмірдің мән-мағынасына философиялық тұрғыдан қарауымен ерекшеленеді.
Шара барысында оқушылар жазушының өмірі мен шығармашылығымен танысып, аудиокітаптан жазушының «Қонақтар» әңгімесін тыңдады. Шығарманы жазудағы міндетін, атауының мәнін анықтады және мазмұнын кезеңдерге бөліп әдеби талдау жасап, әңгіме кейіпкерлеріне мінездеме берді, сондай-ақ жазушының әңгіме жайлы айтқан пікірін видеодан тыңдады. Сюжеттік мағынасын талқылап, өз ойларымен бөліскен Солтанғазина Анел, Тұрсымбекова Аяулым, Кенжебек Мөлдір және Мерейұлы Серікжан сынды оқушылар сапалы дайындықтарын байқатты.
Оқушылар шығарманы талқылай келе, әңгіменің идеясы мен айтар ойы тереңде екендігі және әлі күнге дейін өзегін жоймаған шығарма деп, әлпештеп өсірген ата-ана алдындағы баланың перзенттік парызы екендігін ұғындарын айтып, өз тұжырымдарын жасады. Қатысушылар назарына Абайдың рухани орталығына және «Қазақ прозасының пырағы» атты кітап көрмесіне шолу жасалынып, шара қонақтарына кітапхана атынан Алғыс хат табысталды. Іс-шараға бұқаралық ақпарат құралдарының өкілдері ТВК-6 телеарнасы қатысты.