Түбі бір түркі әлемі: ақпараттық танымдық сағат

Кітапхана Дүниежүзілік кітап және авторлық құқық күніне орай дәстүрлі түрде жыл сайын «Кітап шоу» фестивалін өткізеді. Осыған орай Түркі мемлекеттері Ұйымы жариялаған «2023 жыл – Түркі өркениетінің даму жылы» аясында «Түбі бір түркі әлемі» ақпараттық танымдық сағат ұйымдастырылды.
Мәдени шараға М. Төлеубаев атындағы саз училищесінің студенттері және №45 ЖББО мектептің оқушылары қатысты.
Шара барысында қатысушыларға Түркі әлемінің жаңа тәуелсіз мемлекеттері – Әзірбайжан, Қазақстан, Өзбекстан, Түркіменстан және Қырғызстанның тарихы, мәдениеті және қазіргі даму бағыттары туралы ақпараттар берілді.
Мәдени шарада студенттер мен оқушылар бүгінгі қазақтың сайын даласынан әлемнің әр түкпіріне тараған түркі тектес тайпалар мен халықтар, басқа елдер мен өңірлердің тарихи үдерістеріндегі дамуы, бүгінгі түркі әлеміне енетін мемлекеттер туралы, Түркі мемлекеттер Ұйымының қызмет бағыттары жайында көптеген мағлұматтар алды.
Ақпараттық танымдық сағатта қатысушыларға кітапхана мамандары танымдық интеллектуалды ойындар ұйымдастырды. Студенттер мен оқушылар ежелгі түркі дүниесінің тарихы мен мәдениетіне қатысты «Тарихқа шолу!» сұрақ-жауап, «Түркітану» сауалнама, «Түркі тілдес елдерге саяхат» интеллектуалды ойындарға жоғары қызығушылықпен қатысты.
«Түркі халықтарының өткені мен бүгіні» тақырыбында кітап көрмесі ұсынылды. Көрмеде кітапханамыздың қорынан тарихи кітаптар, оқулықтар, түркі өркениетінің қалыптасуы мен дамуы туралы материалдар ұсынылды. К.Аманжолов «Түркі халықатырының тарихы», Ә.Қайдар «Түркітануға кіріспе», Ж.Бейсенбайұлы «Арғы түріктер ақиқатының ізімен», «Түркі әлемінің көшбасшысы», Ұ.Есназарова «Түркі тілдес елдер географиясы» т.б. әдебиеттерге шолу жасалды.
Шара соңында «Түркілер туралы тарихи деректер» атты деректі фильм көрсетілді.