Ұрпақтар ұмытпайтын Ұлы Жеңіс!: кең көлемді кітап көрмесі

Ұлы Жеңіс күні – ардагерлеріміздің ерлігін, батылдығын паш ету мен қатар, бейбіт өмір мен Отан үшін жан қиған жауынгерлерімізді еске алатын ерекше маңызды күн. Осы айтулы мереке қарсаңында кітапхана пайдаланушыларына «Ұрпақтар ұмытпайтын Ұлы Жеңіс!» тақырыбында кең көлемді кітап көрмесі ұсынылды. Мерекелік шараға қаламыздағы әскери бөлімдердің басшылары мен №17, №22 ЖОББ мектептердің оқушылары қатысты.

Мәдени шара жастардың Отан тарихына деген сүйіспеншіліктерін арттыру, Жеңіс салтанатын көре алмай кеткен боздақтардың ерлік істеріне тағзым ету, халқымыздың тарихын құрметтей білуге тәрбиелеу мақсатында ұйымдастырылды.

Көрмеге келушілердің назарына қазақстандықтар мен семейліктердің Ұлы Отан соғысына қатысуы туралы ақпараттар беріліп,  отандастарымыздың ерлігіне арналған кітаптар, ел тыныштығын сақтауға өлшеусіз үлес қосқан батырлар жайлы жазылған шығармалар,  фотоальбомдар мен өмірбаян очерктер, соғыс кезеңдері мен шайқас оқиғалары туралы тарихи деректерден мәліметтер ұсынылды.

Кітап көрмесінде Л. Ахметованың «1941 жыл. Брест қамалы. Қазақстан»,  Б.Жұмағалиевтің  «Қазақтар Ленинград майданында»,  В.Быковтың «Катюша»,  С. Бақбергеновтың «Белгісіз солдат», «Майдан жырлары»,  М.Ғабдуллиннің «Менің майдандас достарым», Ғ.Мүсіреповтің «Қазақ солдаты», Қ. Қайсеновтың «Жау тылындағы бала», Е. Елғонның «Жаһандық соғыстың ерлері»,  «Майдан жырлары», «Қаһарман қыз Хиуаз» және т.б. кітаптары қойылды. Көрмеден орын алған жауынгерлердің батырлықтарын айқындайтын әдеби шығармалар мен өлеңдер, Жеңіс туралы жазылған ғылыми еңбектер мен Ұлы Отан соғысына қатысқан ардагер ғалымдардың  естеліктеріне шолу жасалды.

Барлық соғыс ардагерлері мен кітапхананың пайдаланушыларын Жеңіс күнімен шын жүректен құттықтаймыз!