7 мамыр – Отан қорғаушылар күні: кең көлемді кітап көрмесі

3 мамыр күні Абай атындағы кітапханада Радиотехника және байланыс колледжінің студенттері мен кітапхананың тұрақты оқырмандарына Қазақстан Республикасының Қарулы Күштерінің 31 жылдығына арналған  «7 мамыр – Отан қорғаушылар күні» атты кең көлемді кітап көрмесі ұйымдастырылды.

Шараға қатысушыларға айтулы мерекенің, Қазақстан Қарулы Күштерінің құрылу тарихы таныстырылды. Қазақстан Республикасы Қарулы Күштерін дамыту мен нығайтудың негізгі кезеңдері атап өтілді.

Көрмеде жастарды отансүйгіштікке тәрбиелеу тақырыбында, Қазақстан Қарулы Күштерінің кешегі мен бүгінгі жай-күйін ашатын кітаптар мен мерзімді басылымдар қойылды. Кітаптардың ішінде «Отан қорғау – сенің азаматтық борышың», Қ.Аманжоловтың, А.Тасболатовтың «Қазақстанның әскери тарихы» кітаптарына, А.К. Кушкумбаевтың «Военное дело казахов в XVII – XVIII веках» атты еңбектеріне ерекше назар аударылды. Қазақстанның ежелгі дәуірден егеменді Қазақстанға дейінгі әскери тарихының мәселелері ашылды. С.Нұрмағамбетов «От огненных лет до суверенной армии» атты естеліктер жинағында  қазақ әскери бөлімдерінің Ұлы Отан соғысына қатысуын, егемен Қазақстанның Қарулы Күштерінің құрылуы туралы замандастарының естеліктерімен бөліседі.

Сондай-ақ, көрермендер еліміздегі жастарды әскери даярлау тақырыптары баяндалатын Б.Қ.Сақтағановтың «Әскери педагогика» кітабына қызығушылық танытты.