Төлен Әбдіктің «Парасат майданы» повесі: оқырман конференциясы

«Бір ел – бір кітап» республикалық акциясы аясында 18 мамыр күні Абай атындағы облыстық әмбебап кітапханасында белгілі жазушы, драматург, қоғам қайраткері Төлен Әбдіктің «Парасат майданы» повесі бойынша оқырмандар конференциясы өтті. Т. Әбдіктің қазақ әдебиетінде алатын орны ерекше. Ол қазақ әдебиетіне жаңашылдық пен өзгеше леп әкелеген жазушылардың бірі. «Парасат майданы» – жазушының адамзатқа бағытталған жанайқайы; өмірдің тылсым сырына үңілген жанның өзгелерге айтар өсиеті. Төлен Әбдіктің аталған философиялық шығармасында қоғамның болашағы үшін қам жегенін, оған жаны ашып, жол сілтемек болғанын байқаймыз.
Жазушының «Парасат майданы» повесі – Франц Кафка атындағы алтын медалімен және Қазақстан Республикасының Мемлекеттік сыйлығымен марапатталған ең көрнекті шығармасы. Конференцияға Шәкәрім атындағы университеттің филология факультетінің «Қазақ тілі мен әдебиеті» мамандығының 3 курс студенттері қатысты.
Конференция студенттер Сәлімжанов Бауыржан мен Қуанышева Әйгерімнің жазушы шығармашылығы және «Парасат майданы» шығармасы туралы баяндамаларымен басталды. Баяндамалар тыңдалғаннан кейін студенттер арасында тақырыпты қызу талқылау басталды. Пікірлер екіге бөлініп, әрқайсысы өз көзқарасын білдірді. Ең белсенділері Сайленова Аяулым, Қанағатова Аяжан, Оралғазинова Айгерім, Мұрат Айсәуле, Ким Данна және т. б. болды.
Студенттер оқиға не туралы, автор нені көрсеткісі келді, шығарма қалай қабылданды, кейіпкерлердің қайсысы рухы, дүниетанымы жағынан жақынырақ, шығармадан өздеріне не алды, т. б. сұрақтарға жауап берді. СтуденттерТ. Әбдіктің «Парасат майданы» шығармасы мен американдық «Бойцовский клуб» атты психологиялық триллер арасындағы байланысты байқады. Идеясы адамның ішкі әлемінің бейнесіне, адам бойындағы жарық пен қараңғылықтың күресіне негізделген.
Оқырмандар конференциясы Төлен Әбдіктің «Парасат майданы» шығармасында көтерілген тақырыптардың бүгінгі күнге дейін өзекті екенін көрсетті.